“Dunyo” axborot agentligining xabariga ko‘ra, o‘zbekistonlik tajribali haydovchilar Birlashgan Arab Amirliklaridagi kompaniya tomonidan taksichilikka jalb etilishi mumkin.

Ma’lum qilinishicha, O‘zbekiston Bosh konsulxonasi xodimlari BAAning Dubai Taxi Company PJSC korxonasi rahbari Sayid Amin Abdulrahman bilan muzokara o‘tkazdi. Unda O‘zbekistondan malakali haydovchilarni BAAda qonuniy ravishda munosib ish bilan ta’minlash masalalari muhokama qilindi.

“Dastlabki bosqichda korxonamizga 200 ga yaqin O‘zbekiston fuqarolarini taksi haydovchisi sifatida ishga jalb qilish uchun imkoniyatimiz bor. Agar ularning mehnat samaradorligi yuqori bo‘lsa, yana qo‘shimcha ravishda 500 ga yaqin o‘zbekistonlik taksi haydovchilarini ishga jalb qilish mumkin”, – degan Sayid Amin Abdulrahman.

Muzokaralar yakunida O‘zbekiston Mehnat agentligi va Dubai Taxi Company PJSC korxonasi vakillari o‘rtasida ushbu jabhadagi hamkorlikning keyingi bosqichlarini muhokama qilishga kelishib olindi.

• BAA
• Hamkorlik
• Haydovchi