O‘zbekiston Prezidenti Shavkat Mirziyoyev uchuvchi-kosmonavt Vladimir Jonibekovni “Do‘stlik” ordeni bilan mukofotladi. Bu haqda xabar bergan “O‘zbekiston 24” telekanaliga ko‘ra, bu borada davlat rahbarining tegishli farmoni imzolangan.

Jonibekov 13-may kuni 80 yoshga to‘ldi. Yubiley sana munosabati bilan O‘zbekistonning Rossiyadagi elchisi Botirjon Asadov kosmonavtning Moskva viloyatidagi xonadonida mehmonda bo‘lib, unga O‘zbekiston prezidenti Shavkat Mirziyoyevning tabrik maktubini o‘qib eshittirdi va “Do‘stlik” ordenini topshirdi.

“Hurmatli Shavkat Miromonovich, menga bo‘lgan eʼtiboringizdan minnatdorman. Men o‘zimning eng samimiy salomlarimni O‘zbekistonga – men tug‘ilib o‘sgan Vatanimga, do‘st-u birodarlarimga, menga bilim, hayotiy tajribalarni bergan Vatanimga yo‘llamoqchiman. Olijanoblik va atrofdagilarga mehr-oqibatli bo‘lish bu o‘zbek halqiga xos qadriyat. Bu tarixiy merosni asrab-avaylash kerak. Zero, inson uchun o‘zi tug‘ilib o‘sgan, ulg‘aygan yurtdan ko‘ra qadrdonroq yurt bo‘lmasa kerak. Men O‘zbekistonimga farovonlik va omad tilayman”, – deydi Jonibekov.

Maʼlumot uchun, “Do‘stlik” ordeni O‘zbekistonda istiqomat qiluvchi barcha millat va elat vakillari o‘rtasidagi do‘stlik, o‘zaro anglashuv va hamjihatlikni mustahkamlash, O‘zbekiston xalqining boshqa mamlakatlar xalqlari bilan do‘stligi va har tomonlama hamkorligini rivojlantirishdagi ulkan yutuqlari uchun topshiriladi. 

• Jonibekov
• Kosmonavt
• Orden