Joriy yilning 7–17-iyul kunlari Amerika Qoʻshma Shtatlarining Birmengem shahrida navbatdagi Butunjahon sport oʻyinlari musobaqasi boʻlib oʻtadi.

Mazkur musobaqada dunyoning 110 mamlakatidan 3 ming 600 nafarga yaqin sportchi ishtirok etadi.

Butunjahon sport oʻyinlari musobaqasi har 4 yilda oʻtkazilib, dasturning aksariyat qismi noolimpiya sport turlaridan tashkil topgan kompleks musobaqalar hisoblanadi.

Taʼkidlanishicha, 2021-yilda oʻtkazilishi lozim boʻlgan ushbu musobaqa epidemiologik vaziyat sababli bir yilga kechiktirilgan.

Ushbu nufuzli musobaqada jahonning kuchli sportchilari qatorida oʻzbekistonlik sportchilar ham ishtirok etish imkoniyatiga ega boʻlishgan.

Bu galgi Butunjahon sport oʻyinlarida karate boʻyicha jahon chempioni Doston Otabolayev, badiiy gimnastika boʻyicha nufuzli musobaqalar gʻolibasi Yekaterina Fetisova, u-shu sport turida Darya Latisheva, jiu-jitsu boʻyicha jahon chempioni Bahromjon Masharipov, muay-tayda chempionlikka erishgan Fanat Qahramonov Oʻzbekiston sharafini himoya qiladilar.

Musobaqalar dasturiga binoan oʻzbekistonlik sportchilar 8-9-iyul kunlari karate, 12-13-iyul kunlari gimnastika, 13-iyul kuni u-shu, 15-iyulda jiu-jitsu va 15-17 kunlari muay-tay boʻyicha bahslarda ishtirok etadilar.

Musobaqalar 17-iyulga qadar davom etadi.

• AQSh
• O‘zbekiston
• Sport