O‘zbekistonda ramazon oyida ehtiyojmand aholini qo‘shimcha qo‘llab-quvvatlash maqsadida 1 million so‘m va 500 ming so‘mdan yordam pullari berilishi xabar qilingandi. Bunday xabarlardan so‘ng firibgarlar turli yo‘llar bilan fuqarolar pullarini qo‘lga kiritishi mumkinligi sababli fuqarolar ogoh bo‘lishga chaqirildi.

Prezident qaroriga ko‘ra, 2026-yil 1-martga qadar 1 million so‘mdan bir martalik moddiy yordam ijtimoiy reyestrda davlat ta’minotida turgan 215 mingta oilaga, shuningdek, yolg‘iz yashovchi keksalar va nogironligi bo‘lgan 13 ming nafar shaxsga beriladi. Bundan tashqari, kambag‘al toifadagi 421 mingta oilaga 500 ming so‘mdan ajratilishi ko‘zda tutilgan. Yagona interaktiv davlat xizmatlari portali buning uchun fuqarolardan hech qanday ariza shart emasligini, pul mablag‘lari 1-martga qadar fuqaroning ijtimoiy kartasi yoki plastik kartasiga avtomatik tushishini bildirdi.

Firibgarlarga aldanmaslik uchun quyidagilarga rioya qilish so‘raldi:

“Agar sizga pulni olish uchun ariza bering” deyishsa — bu yolg‘on! SMS kodni bermang.

Bankdan yoki 5500 xizmatidan kelgan maxfiy kodni hech kimga (hatto o‘zini bank xodimi yoki mahalla raisi deb tanishtirsa ham) aytmang.

Shubhali havolalarga kirmang. “To‘lovni qabul qilib oling” degan mazmundagi Telegram botlar yoki rasmiyga o‘xshash soxta saytlarga karta ma’lumotlarini kiritmang.

“Agar sizdan pul tushirib berish uchun kod so‘rashsa yoki qaysidir saytga karta raqamingizni yozishni talab qilishsa, bilingki — qarshingizda firibgar turibdi. Davlat tashkilotlari sizga hech qachon “pulingizni olish uchun havolaga kiring” deb SMS yubormaydi. Ramazon oyi xonadoningizga baraka olib kelsin! Omonatlaringizga ehtiyot bo‘ling”,  –deyiladi xabarda. Shaxs ijtimoiy reyestrga kiritilgan oila a’zosimi yoki yo‘qligini rasmiy my.gov.uz portali orqali bepul tekshirishi mumkin.​

• Firibgarlik
• Moddiy yordam
• Ogohlantirish
• Ramazon