Umra safarlari o‘zbekistonliklar uchun yaqin kunlarda tiklanish mumkin.
Saudiya Arabistoni podshohligi haj va umra vazirligi tarafidan xorijiy davlatlar turoperatorlarini ro‘yxatga olish portalida keltirilgan ro‘yxatga O‘zbekiston musulmonlar idorasi ham kiritildi.

Ma’lumot uchun, Podshohlikning rasmiy saytidan qaysi davlatdan nechta turfirmalar Umra safari xizmatlarini ko‘rsatishi bilan tanishish mumkin.

Mazkur portalda O‘zbekistondan faqatgina musulmonlar idorasi ro‘yxatdan o‘tgan bo‘lib, masalan, qo‘shni Qirg‘izistondan esa 15 ta turfirma ro‘yxatdan o‘tgan.

Shuningdek, Qozog‘istondan 4ta, Tojikistondan 3ta, Rossiyadan 6ta, AQShdan 26ta, Fransiyadan 36ta turfirmalarning o‘z fuqarolariga mazkur xizmatni ko‘rsatishlari uchun ruxsat berilgan.

Ayrim tasdiqlanmagan xabarlarga ko‘ra, O‘zbekiston musulmonlar idorasi tarafidan ushbu mavsum umra safarlari uchun belgilanadigan narxlar smetasi taxminan 1500 AQSh dollari atrofida bo‘lishi kutilmoqda.

O‘zbekistondagi turfirmalardan birining mas’uli Mansurjon Rasuljonovning takidlashicha, qirg‘iz ziyoratchilari ayni safarga 1000 dollardan boshlangan to‘lov evaziga borib kelishadi. Qozog‘istonlik fuqarolar esa Saudiya Arabistoni podshohligi turist vizasini onlayn rejimda qisqa muddatda 200 dollar evaziga rasmiylashtirib, aviachipta va mehmonxonalarni bron qilishadi va aerport orqali uchib ketish imkoniga egalar.

• Saudiya Arabistoni
• Umra