“So‘nggi paytlarda Turkiyada yashash (ikamet izni) va mehnat qilish ruxsatnomalari (çalışma izni)ni rasmiylashtirish, mamlakatga kirish taqiqini bekor qilish hamda jarimalarni to‘lash bilan bog‘liq firibgarlik holatlari keskin ortmoqda.

Ko‘p hollarda konsalting firmalari (danışmanlık şirketleri) yuqoridagi masalalarni hal qilishga va’da berib, yurtdoshlarimizning katta miqdordagi pullarini aldov yo‘li bilan o‘zlashtirmoqda.

E’tiborga molik jihati shundaki, jabrlanuvchilar ushbu shaxslar bilan yozma shartnoma yoki hujjatlashtirilgan kelishuvlar tuzmaganliklari bois, qonuniy tartibda o‘z mablag‘larini qaytarib ololmayapti.

Eng xavotirli jihatlardan biri — ayrim firibgarlarning ilgari Turkiyadan deportatsiya qilingan va kirish taqiqi qo‘yilgan O‘zbekiston fuqarolarini boshqa davlatning qalbaki pasportlari orqali mamlakatga olib kirishga urinish holatlaridir. Bu esa o‘z o‘rnida yurtdoshlarimizni murakkab va jinoiy javobgarlikka olib keladigan vaziyatlarga solmoqda.

Shuningdek, ayrim shaxslar “GÖÇ idorasi (Migratsiya xizmati)dagi jarimangizni o‘rningizga to‘lab beramiz” degan va’dalar bilan pullarni o‘zlashtirish holatlari ham aniqlanmoqda. Ular jabrlanuvchilarni “o‘zingiz borsangiz ushlanib qolasiz” degan yolg‘onlar bilan qo‘rqitib, ularni mablag‘larini o‘zlashtirmoqda.

Hurmatli yurtdoshlar!

Bosh konsulxona sizlarni noqonuniy va ishonchsiz vositachilardan ogoh bo‘lishga va har qanday huquqiy masalalarda faqat rasmiy idoralarga murojaat qilishga chaqiradi.

Qonunni buzgan holda Turkiyaga kirishga urinish yoki noqonuniy vositachilarga murojaat qilish — og‘ir huquqiy oqibatlarga olib kelishi mumkin!”, – deyiladi konsullik murojaatida.

• Firibgarlik
• Istanbul
• Konsullik
• Murojaat
• Ogohlantirish
• Turkiya
• migrant