Joriy yilning 13-aprel kuni O‘zbekiston fuqarosi tomonidan Istanbul metropolitenida ruxsatsiz tarzda turk fuqarosi bo‘lgan ayolni suratga olish holati aniqlangan. Ushbu harakat ayol tomonidan huquq-tartibot organlariga ma’lum qilinganidan so‘ng fuqaro qo‘lga olingan, holat yuzasidan tergov harakatlari boshlangan.

Natijada:

– fuqaroning Turkiyada ishlash huquqini beruvchi ruxsatnomasi (Çalışma izni) bekor qilindi;

– unga nisbatan ma’muriy jazo va majburiy deportatsiya choralari ko‘rilmoqda;

– ushbu harakat shaxsiy hayot daxlsizligini buzish sifatida baholangan.

Bosh konsulxona aralashuvi natijasida mazkur fuqaroga nisbatan jinoiy javobgarlik bilan bog‘liq bo‘lmagan chora ko‘rilishiga erishilgan.

Turkiya qonunlariga ko‘ra, boshqa shaxsni, ayniqsa ayollarni, ularning roziligisiz suratga olish yoki videoga tushirish qat’iyan man etiladi va bu jinoiy javobgarlikka olib kelishi mumkin.

“Hurmatli yurtdoshlar, Turkiyada bo‘lishingiz davomida mahalliy qonun-qoidalarga qat’iy rioya qiling. Begona shaxslarni ularning ruxsatisiz suratga va videoga olish yoki ularga noqulaylik tug‘diruvchi harakatlar sizga nisbatan jiddiy choralar ko‘rilishiga sabab bo‘lishi mumkin.

Huquqiy muammolarga yo‘liqmaslik uchun harakatlaringizda ehtiyotkor bo‘ling”, – deyiladi konsulxona xabarida.

• Istanbul
• Metro
• Turkiya
• migrant