O‘zbekistonning Jahon mamlakatlari demokratiyasi indeksidagi o‘rni ma’lum bo‘ldi. Bu haqda Oliy Majlis Senatida Tanzila Norboyeva o‘tkazilgan Xalqaro reyting va indekslar bilan ishlash bo‘yicha respublika kengashining yig‘ilishida gapirib o‘tgan. 

Ta’kidlanishicha, 2021-yilda e’lon qilingan jami 19 ta xalqaro reytingda O‘zbekistonning o‘rni aks etib, 11 tasida mamlakat o‘z pozitsiyasini yaxshilagan. Shuningdek, Global innovatsiyalar indeksida O‘zbekiston 2021-yilda 7 pog‘onaga ko‘tarilib, 132 ta davlat orasida 86-o‘rinni egallagan va eng tez yuqorilagan mamlakatlar 10 taligiga kirgan.

Qayd etish joiz, Jahon mamlakatlari demokratiyasi indeksining 2021-yil yakunlari bo‘yicha e’lon qilingan reytingda O‘zbekiston o‘z pozitsiyasini 5 pog‘onaga yaxshilab, 150-o‘rinni egallagan. Jahon banki tomonidan yuritiladigan Boshqaruv sifati indikatorlarining 2 tasida mamlakatning o‘rni yaxshilangan bo‘lsa, 2 tasida pasaygan. Shuningdek, aholi fikrini hisobga olish va hisobdorlik hamda Huquq ustuvorligi indikatorlarida O‘zbekiston o‘z pozitsiyasini yaxshilay olmagan.

Bundan tashqari, aholi fikrini hisobga olish va hisobdorlik indikatorida  190-o‘rindan 194-o‘ringa, Huquq ustuvorligi indikatorida 179-o‘rindan 181-o‘ringa tushgan.

“Meros” jamg‘armasining Iqtisodiy erkinlik indeksida O‘zbekiston 177 ta davlat orasida 117-o‘rinni egallab, 2021-yilga nisbatan 9 pog‘onaga pasaygan va mamlakat iqtisodiyoti “asosan erkin bo‘lmagan mamlakatlar” guruhida qoldi.

Xususan, xalqaro reytinglarda O‘zbekistonning o‘rnini yaxshilash bo‘yicha 2021-yilga mo‘ljallangan chora-tadbirlar rejasida belgilangan jami 512 ta banddagi vazifalarning 96 foizi (489 tasi) bajarilgan. 

• O‘zbekiston
• demokratiya
• reyting