Markaziy bank O‘zbekistonning joriy yil 9 oyi uchun To‘lov balansi, xalqaro investision pozisiyasi va tashqi qarzi bo‘yicha nashriga qisqacha sharhini e’lon qildi.

MB sharhida O‘zbekiston Respublikasining umumiy tashqi qarzi hamda mamlakatning chet el valyutasidagi aktivlari haqida ham ma’lumot berildi.

Unga ko‘ra, mamlakatning umumiy tashqi qarzi joriy yil boshiga nisbatan 11 foizga yoki 3,7 mlrd. dollarga oshib, 2021-yil 1-oktyabr holatiga 37,6 mlrd. dollarni (joriy yilning 1-yanvar holatiga 33,8 mlrd. dollar) tashkil qildi.

Xususan, yil boshiga nisbatan davlat tashqi qarzi 7 foizga yoki 1,5 mlrd. dollarga o‘sib 22,9 mlrd. dollarni, davlat tomonidan kafolatlanmagan tashqi qarz esa 18 foizga yoki 2,2 mlrd. dollarga o‘sib 14,7 mlrd. dollarni tashkil etdi.

Hisobot davrida mamlakatning chet el valyutasidagi aktivlari 68,3 mlrd. dollarni, tashqi majburiyatlarining hajmi esa 51,4 mlrd. dollarni tashkil etdi. Shu munosabat bilan, O‘zbekiston Respublikasining sof investitsion pozisiyasi yil boshiga nisbatan 17 foizga yoki 3,4 mlrd. dollarga qisqarib, joriy yilning 1-oktyabr holatiga 16,9 mlrd. dollarni tashkil etdi.

• Kurs_valyuta
• Markaziy bank
• Tashqi qarz