Joriy yilning 16-noyabr kuni Oʻzbekistonning shimoliy hududlariga, 17–18-noyabr kunlari respublikaning barcha hududiga Volga boʻyi orqali Rossiyaning Yevropa hududi (Moskva viloyati) ustida shakllangan nam va sovuq havo massasi kirib keladi. Bu haqda Oʻzgidromet xabar berdi.

Qayd etilishicha, 16–17-noyabrda respublika boʻyicha shamol tezligi 17–22 m/s gacha kuchayishi kutilmoqda, baʼzida 25–28 m/s gacha kuchayishi mumkin, baʼzi joylarda changli boʻron boʻladi.

Shuningdek, 16–noyabrda Qoraqalpogʻiston va Xorazm viloyatida, 17–noyabrda Oʻzbekistonning qolgan hududlarida yogʻingarchilik (yomgʻir, qorga aylanadi) boʻladi, 17–18-noyabrda togʻ oldi va togʻli hududlarda yogʻingarchilik (yomgʻir, qor) baʼzi joylarda kuchli boʻladi.

Bundan tashqari, Respublika boʻyicha harorat keskin pasayishi kutilmoqda. 16–17-noyabrda shimolda, 17–18-noyabrda Oʻzbekistonning qolgan hududlarida harorat kechalari 5–8° sovuqqacha, kunduz kunlari 0–3° iliqqacha, shimolda kechalari 12–15° sovuqqacha, kunduz kunlari 0–3° sovuqqacha pasayadi.

• Ob-havo
• O‘zgidromet