“Ozodlik Radiosi” O‘zbekistonda akkreditatsiyadan o‘tkazilishi mumkin. Bu borada joriy yil 31-may kuni AOKA direktori Asadjon Xodjayev, “Ozod Yevropa Radiosi/Ozodlik Radiosi” media korporatsiyasi prezidenti Jeymi Flay va media-korporatsiya vakili Pahlavon Turg‘unov uchrashuvida gap borgan.

Muloqot davomida Agentlik faoliyatining asosiy yo‘nalishlari, O‘zbekistonda axborot sohasini liberallashtirish, so‘z va matbuot erkinligi hamda davlat idoralari ochiqligini taʼminlash borasida olib borilayotgan islohotlar to‘g‘risida maʼlumot berildi.

Muloqot davomida “Ozodlik Radiosi” media korporatsiyasi vakillarini respublikada akkreditatsiyadan o‘tkazish masalasi ham muhokama etildi. Ikki tomon akkreditatsiya bilan bog‘liq masalalarni navbatdagi uchrashuvlarda ko‘rib chiqishga kelishib olishdi.

Tomonlar uchrashuvda, shuningdek, o‘zaro mavjud masalalar, ularni hal etish yo‘llari, shu jumladan “Ozodlik Radiosi” tahririyati tomonidan tayyorlanayotgan va chop etilayotgan materiallarning O‘zbekiston qonunchiligi va jurnalist etikasi meʼyorlariga mos kelishi yuzasidan o‘z mulohazalarini bildirishgan va ushbu masalalarni bartaraf etish borasida bosib o‘tilishi mumkin bo‘lgan qadamlar haqida fikr almashishgan.

Maʼlumot uchun, o‘sha kuni siyosatshunos K.Rabbimov ham “Ozodlik” radiokorporatsiyasi prezidenti va bir qancha vatandoshlik jamiyati vakillari bilan bo‘lib o‘tgan uchrashuv haqida maʼlumot berib, Jemiye Flayning quyidagi so‘zlarini iqtibos keltirgan edi:

“Ozodlik radiosi O‘zbekistonda rasman ro‘yxatdan o‘tsa-o‘tmasa, bizning axborot olish va tarqatish salohiyatimiz o‘zgarmaydi, yaʼni, oshib ketmaydi. Biz qanday maʼlumot olib tarqatayotgan bo‘lsak, shunday tarqataveramiz. Ro‘yxatdan o‘tish, bizga qandaydir taʼsir qilsa – bu davlatning biz bilan rasman muloqot qilish, taʼsir qilish imkoniyati paydo bo‘ladi. Aslida, bundan O‘zbekistonni o‘zi manfaatdor bo‘lishi kerak. Lekin, hozircha O‘zbekiston tomoni “negativ axborot ko‘p, pozitiv kam” degan pozitsiyada turibdi”.

• AOKA
• Akkreditatsiya
• Ozodlik radiosi