Jahon sogʻliqni saqlash tashkilotining navbatdagi yigʻilishida COVID-19 pandemiyasini tugatish masalasi muhokama qilindi.

Unda qayd etilishicha, avvalroq JSST tomonidan koronavirus boʻyicha eʼlon qilingan favqulodda holat 2023-yilda yakunlanishiga umid bildirilgandi. Ammo prognozlar oʻzini oqlamadi.

Xitoyda keskin karantin cheklovlari olib tashlangach, kasallanish va oʻlim koʻrsatkichlari soni kutilmaganda keskin oʻsa boshlagan.

Xususan, 2022-yil dekabr oyi boshidan joriy yil yanvar oyi oʻrtalarigacha bu yerda COVID-19 tashxisi qoʻyilgan 60 ming nafar bemor hayotdan koʻz yumgan.

Tashkilot rahbari Tedros Gebreyesusning maʼlum qilishicha, bu dunyodagi epidemiologik vaziyatga oʻz taʼsirini koʻrsatmoqda. Jumladan, soʻnggi sakkiz haftada jahon boʻyicha koronavirus tufayli 170 ming kishi vafot etgan va ushbu raqamlar xavotirlanish uchun asosli.

“Hozir pandemiya eʼlon qilingan dastlabki davrlarga nisbatan yaxshiroq vaziyatdamiz. Ammo hali global xatar chekingani yoʻq, chunki dunyo aholisi yetarli darajada emlanmagan”, — deydi JSST rahbari.

• JSST
• pandemiya