2022-2026-yillarda chorvachilik ozuqa bazasini kengaytirish va ishlab chiqarish hajmi 1,5-2 barobarga ko‘paytiriladi.

“Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi Prezident farmoni loyihasiga ko‘ra, joriy yil yanvar oyida chorvachilik ozuqa bazasi mustahkamlashga oid normativ huquqiy-hujjat qabul qilinadi.

Unga ko‘ra, davlat byudjeti hisobidan quyidagilar:

– Chorva ozuqa maydonini 722 ming gektarga yetkazish;

– iqtisodiy samarasiz, past hosilli paxta-g‘alla maydonlarida har yili almashlab ekish tizimi orqali 50 ming gektarga beda ekinlarini ekish;

– Qoraqalpog‘iston Respublikasi Bo‘zatov, Nukus, Taxiatosh, Taxtako‘pir, Qorao‘zak va Qo‘ng‘irot tumanlarida 30 ming gektar paxta va g‘alla maydonlari to‘liq ozuqabop ekinlar yetishtirish uchun ajratish;

– g‘alladan bo‘shagan 135 ming gektar takroriy maydonlarda 450 ta parrandachilik korxonalari tomonidan ozuqa (makkajo‘xori va kungaboqar) ekinlari yetishtirishni tashkil etish;

– foydalanishdan chiqqan 20 ming gektarni oborotga kiritish va ozuqa ekinlarini joylashtirish;

– ozuqabop ekinlarning serhosil navlarini ko‘paytirish, yil davomida
2-3 marta hosil olish va hosildorlikni 1,2 barobarga oshirish;

– 58 ta yem ishlab chiqarish korxonalari quvvatini yillik 485 ming tonnaga yetkazish;

– Chorvachilik va parrandachilik ilmiy-tadqiqot instituti qoshida Chorvachilik ozuqa ekinlari markazini tashkil etish va unga ozuqabop ekinlar superelita va elita urug‘larini yetishtirish hamda tajribadan o‘tkazish uchun Toshkent viloyatida 50 gektar yer maydonini ajratish ishlari amalga oshiriladi.

Shuningdek, yaylovlardan samarali foydalanish, qayta tiklash va hosildorlikni oshirish maqsadida 2022-yilda 2,2 mln gektar yaylovlarda geobotanik tadqiqotlar amalga oshiriladi va yaylovlarni qayta tiklash choralari ko‘riladi. Bundan tashqari cho‘l yaylov o‘simliklari urug‘chiligi bazasi yaratiladi.

Prezident farmoni loyihasida ko‘zda tutilayotgan yuqoridagi tadbirlar nazorati Bosh vazir o‘rinbosari Sh. Gʻaniyevga yuklatilmoqda.

• Chorvachilik
• Loyiha