Prezident Paxta xomashyosini yetishtirish va uning yig‘im-terim xarajatlarini moliyalashtirish tizimini takomillashtirish bo‘yicha qarorni imzoladi. Unga ko‘ra 2022-yil hosilidan boshlab paxtani yetishtirish va uning yig‘im-terimini moliyalashtirish bilan Qishloq xo‘jaligini davlat tomonidan qo‘llab-quvvatlash jamg‘armasi shug‘ullanadi. Ushbu jamg‘arma mablag‘lari quyidagi tartibda joriy etiladi:  

a) paxta xomashyosini yetishtirish va paxta yig‘im-terimini imtiyozli moliyalashtirish paxta-to‘qimachilik klasterlari va Urug‘chilikni rivojlantirish markazi tarkibidagi elita urug‘chilik xo‘jaliklari orqali amalga oshiriladi;

b) tijorat banklari tomonidan Jamg‘arma resurslari hisobidan quyidagilar uchun imtiyozli kreditlar ajratiladi:

paxta-to‘qimachilik klasterlariga paxta yetishtirish uchun – paxta xomashyosi qiymatining 60 foizigacha miqdorda yillik 10 foiz (shundan, 2 foizi bank marjasi) stavkada 24 oyga, shu jumladan, 18 oylik imtiyozli davr va 19-oydan boshlab so‘nggi 6 oy davomida teng ulushlarda qaytarish sharti bilan;

Urug‘chilikni rivojlantirish markazi tarkibidagi elita urug‘chilik xo‘jaliklariga paxta xomashyosi yetishtirish uchun – paxta xomashyosi qiymatining 60 foizigacha miqdorda yillik 10 foiz (shundan, 2 foizi bank marjasi) stavkada 14 oyga;

paxta-to‘qimachilik klasterlari va Urug‘chilikni rivojlantirish markazi tarkibidagi elita urug‘chilik xo‘jaliklariga paxta yig‘im-terimini moliyalashtirish uchun – paxta xomashyosi qiymatining 20 foizigacha miqdorda yillik 10 foiz (shundan, 2 foizi bank marjasi) stavkada 12 oyga, shu jumladan, 3 oylik imtiyozli davr bilan.

Qarorga ko‘ra, Bosh vazir o‘rinbosari va moliya vaziri qishloq xo‘jaligi mahsulotlarini yetishtirish bilan bog‘liq tadbirlarni uzluksiz moliyalashtirish uchun 2022-yilda Jamg‘armaga byudjetdan 5 trillion so‘m beg‘araz moliyaviy yordam hamda Jamg‘armaning asoslangan hisob-kitoblariga ko‘ra 7,5 trillion so‘mgacha byudjet ssudasi ajratadi.

• Prezident
• Qaror