Joriy yil Davlat bojxona xizmati organlari tomonidan huquqbuzarlik ashyosi sifatida olib qo‘yilgan jami pirotexnika vositalarining umumiy qiymati 4 mlrd. 695 mln. so‘mni tashkil qiladi.

2021-yil 27-dekabr kuni AOKAda o‘tkazilgan brifingda Davlat bojxona xizmati organlari tomonidan pirotexnika -vositalarining noqonuniy aylanmasiga qarshi kurash yo‘nalishida amalga oshirilayotgan chora-tadbirlar haqida so‘z yuritilgan.

Davlat bojxona qo‘mitasi axborot xizmati rahbari o‘rinbosari Husan Tangriyevn ta’kidlashicha, joriy yilning 27-dekabr holatiga ko‘ra, respublikamiz bojxonachilari tomonidan yil boshidan buyon aniqlangan 209 ta bojxona qonunbuzilishi holatlarida 5 mln. 732 ming donadan ortiq pirotexnika vositalarining noqonuniy aylanmasiga chek qo‘yilgan. 
“Masalan, Davlat bojxona qo‘mitasining Kontrabandaga qarshi kurashish bosh boshqarmasi tomonidan ham fosh qilingan holatda qiymati 500 mln. so‘mlik 14 turdagi 9231 dona pirotexnika vositalarining noqonuniy oldi-sotdisiga chek qo‘yilgan. 2021-yil 25-dekabr kuni aniqlangan holatda esa qiymati 250 mln. so‘mlik 211 818 dona pirotexnika vositalari noqonuniy aylanmasiga chek qo‘yilgani qayd etilgan. 

Farg‘ona viloyatida bojxona xodimlari tomonidan Quvasoy shahrida o‘tkazilgan tezkor tadbirda fuqarolardan birining xonadoni belgilangan tartibda ko‘zdan kechirilgan. Natijada, bu yerda  xorijda ishlab chiqarilgan, ammo bojxona rasmiylashtiruvidan o‘tganligini tasdiqlovchi hujjatlari bo‘lmagan salkam 336 mln. so‘mlik 12 turdagi 215 ming donadan ziyod pirotexnika vositalari borligi aniqlangan.
Mazkur shaharda kuzatuvga olingan yana bir haydovchi esa o‘zi boshqaruvidagi “Kobalt” avtotransport vositasida hovlilardan biriga yashirinishga va mashinani tashlab qochishga urindi. Bu esa bejiz emas ekan. Sababi, mazkur  avtomashinada ham, ushbu xonadonda ham qiymati salkam 227 mln. so‘mlik 7 turdagi 213 806 dona pirotexnika vositalari borligi aniqlanib, ashyoviy dalil tariqasida olindi” dedi Husan Tangriyev.

Umumiy hisobda yil boshidan buyon davlat bojxona xizmati organlari tomonidan huquqbuzarlik ashyosi sifatida olib qo‘yilgan jami pirotexnika vositalarining umumiy qiymati 4 mlrd. 695 mln. so‘mni tashkil qilgan. 
Pirotexnika vositalarining noqonuniy muomalasiga qo‘l urayotganlar orasida voyaga yetmagan shaxslar ham bor. Jumladan, Qoralqalpog‘iston Respublikasida aniqlangan holatda 2008-yilda tug‘ilgan o‘smir 6 ming dona petardalarni sotishga uringan vaqtida to‘xtatib qolingan. Bundan tashqari, Buxoro, Samarqand, Surxondaryo, Navoiy, Xorazm viloyatlarida ham 2004-2006 yillarda tug‘ilgan o‘spirinlar pirotexnika vositalarining noqonuniy muomalasiga qo‘l urgan.

• Pirotexnika