Pokiston ichki ishlar vaziri Mohsin Naqvining aytishicha, rasmiy hujjati bo‘lmagan afg‘on fuqarolariga 2025-yil 1-yanvardan boshlab, Islomobodda qolishiga ruxsat berilmaydi. Kerakli hujjatlarni qabul qilish muddati 2024-yil 31-dekabrgacha belgilangan. Ushbu sanadan keyin barcha afg‘on fuqarolari ham Pokiston pasportiga ega bo‘lishi shart.

“31-dekabrdan keyin hech bir afg‘onning Islomobodda hujjatsiz yurishiga yo‘l qo‘yilmaydi. Agar ular qolishni istasalar, maxsus idoralardan yashash uchun ruxsatnoma olishlari kerak. Yaqin kunlarda batafsil ma’lumot beramiz, ammo ushbu muddatdan so‘ng Islomobodda ruxsatsiz yashash mumkin bo‘lmaydi” – degan vazir.

Ayrim muhojirlar huquqlari faollari afg‘on muhojirlari duch kelayotgan muammolarni hal qilish uchun Afg‘oniston va Pokiston o‘rtasida qo‘shma qo‘mita tuzilishi zarurligini ta’kidlagan.

Avvalroq, BMT 36 mingga yaqin afg‘on muhojiri Pokistondan majburiy deportatsiya qilingani haqida xabar bergan edi.

• Afg‘oniston
• Pokiston
• muhojir