Pokiston mudofaa vaziri Xavaj Muhammad Osif mamlakatning Xayber-Paxtunxva viloyatida besh nafar xitoylikka uyushtirilgan suiqasddan bir kun o‘tib, Pokistondagi terrorizmning manbai Afg‘onistonda ekanini aytdi. Bu haqda Etilaatroz xabar berdi.

Pokiston mudofaa vaziri 27-mart kuni  o‘zining X ijtimoiy tarmog‘idagi sahifasida “Tolibon” Afg‘onistondagi terrorchilik maskanlaridan xabardor ekanligini aytgan. Uning qo‘shimcha qilishicha, Pokistonda terrorchilik hodisalari ko‘paygani sababli chegaradagi vaziyatni tubdan o‘zgartirish zarurati mavjud.

Pokiston va Afg‘oniston chegarasi butun dunyoning an’anaviy chegarasidan farq qiladi, hozirgi vaziyatda Kobul (“Tolibon”) bilan hamkorlikning imkoni yo‘qligi sababli Pokiston bu chegarada barcha xalqaro qonunlar va an’analarni amalga oshirishiga majbur emas, — dedi vazir.

U terrorchilar harakati to‘xtatilishi kerakligini va shu yo‘l bilan ikki davlat o‘zaro munosabatlarini yaxshilashini aytgan.

“Tolibon”, shuningdek, Pokiston rasmiylarining o‘z mamlakati xavfsizligini ta’minlay olmayotganini aytib, muvaffaqiyatsizliklarda ularni ayblamaslikka chaqirgan. Pokistonning daʼvo qilishicha, “Tehrik-e-Tolibon Pokiston” (TTP) yetakchilari  hamda aʼzolari Afg‘onistondan turib Pokistonga qarshi hujumlar amalga oshirmoqda. Pokistonning bir necha bor chaqiruvlariga qaramay, “Tolibon” TTPga qarshi hech qanday chora ko‘rmagan.

• Afg‘oniston
• Pokiston
• Terrorizm