Portugaliyada yashovchi Bobi laqabli it tarixdagi o‘z turining eng keksa vakili sifatida Ginnesning rekordlar kitobiga kiritildi. “Sky news” xabariga ko‘ra Bobi hozirda 30 yoshu 268 kunlik.

Alenteju mastifi (it turi) 1992-yil 11-mayda tug‘ilgan va deyarli butun umrini Portugaliyaning g‘arbiy sohilidagi Kokeyros qishlog‘ida o‘tkazgan. Uning yoshi Leyriya munisipalitetining (o‘zini o‘zi idora qiluvchi organ) veterinariya xizmati va davlat veterinariya ma’lumotlar bazasining yozuvlari bilan tasdiqlangan.

Itning egasi Liunel Koshtaning Ginnes rekordlar kitobi mutaxassislariga aytishicha, kuchukcha Bobi moʻjizaviy tarzda o‘limdan qutulib qolgan. Uning aka-ukalari tug‘ilgandan keyin darhol chuqurga tiriklayin ko‘milgan, chunki allaqachon oilaga tegishli juda ko‘p itlar bo‘lgan. Bobini keyinchalik Liunel va uning ukasi ko‘zlari ochilguncha kattalardan yashirgan, shundan keyin mahalliy odatga ko‘ra, kuchuklardan qutulishning iloji bo‘lmagan.

Bobining egasi so‘zlariga ko‘ra, u hech qachon zanjir yoki bog‘ichni bilmagan hovli iti bo‘lgan, u boshqa hayvonlar, jumladan mushuklar bilan yaxshi til topishadi, haligacha esa juda ochiq va do‘stona. Keksalik tufayli it ko‘rishi yomonlasha boshlagan va so‘nggi paytlarda ko‘p dam oladi. 2018-yilda Bobi nafas olish muammolari tufayli hayvonlar kasalxonasiga yotqizilishi kerak edi. Alenteju shahrida yashovchi mastif itlarning o‘rtacha umr ko‘rish muddati 12-14 yil, ammo Koshtaning so‘zlariga ko‘ra, Bobining onasi 18 yil yashagan, itlarning yana biri 22 yoshga etgan.

Rekordlar kitobidan oldingi uzoq umr ko‘rgan rekordchi Avstraliya janubi-g‘arbidagi Viktoriya shtatida 29 yil yashagan va 1939-yilda og‘ir kasallik tufayli evtanaziya (ahvoli og‘ir uzoq vaqt surunkali kasalliklar bilan og‘rib kelayotgan bemorlarda ma’lum vosita va harakatlar orqali o‘limni tezlashtirish) qilingan cho‘pon it Blyu edi. Uning yoshi ham hujjatlar bilan tasdiqlangan.

Ginnesning rekordlar kitobi bu odamlar va hayvonlarning rekord darajadagi yutuqlari, noyob tabiat hodisalari, shou-biznes, ommaviy axborot vositalari va madaniyatning ajoyib yutuqlari haqidagi ma’lumotlarni ochib beruvchi yillik qo‘llanma.

Birinchi marta 1955-yilda Irlandiyaning Ginnes pivo kompaniyasining buyrug‘i bilan nashr etilgan. Bu g‘oya Irlandiya va Britaniya pablariga tashrif buyuruvchilar uchun u yoki bu hodisaning qayd etilishi bo‘yicha o‘zaro kelishmovchiliklarni hal qilish uchun nufuzli manba yaratish g‘oyasi bilan chiqqan Xyu Biverga tegishli edi.

• Ginnes
• Portugaliya
• rekord