Qayd etilishicha, yil boshidan 3,5 milliard dollarlik 3 mingta loyiha ishga tushib, 76 mingta yuqori daromadli doimiy ish o‘rni yaratilgan.

Shuningdek, tadbirkorlik uchun 82 trillion so‘m kredit va 15,5 trillion so‘m subsidiya berilib, 600 ming aholi biznesga jalb qilingan. Berilgan yengillik va imtiyozlar hisobiga tadbirkorlar ixtiyorida 56,3 trillion so‘m mablag‘ qolgan.

Ma’lum qilinishicha, Sayxunobod, Uychi, Zarbdor va G‘ijduvon tajribalari boshlangani, iqtisodiy kompleks mahallaga tushirilgani hisobiga 4 mingdan ortiq mahalla sanoat va qishloq xo‘jaligiga ixtisoslashgan va 1 million 600 ming aholi rasmiy band bo‘lgan.

“Yashil” energetikadagi islohotlar natijasida hozirgacha ishga tushgan 2,4 gigavattli 10 ta quyosh va shamol elektr stansiyalari hisobiga birinchi yarim yillikda 1,6 milliard kilovatt “yashil” energiya olingan.

Bu esa, o‘z navbatida, yarim milliard kub metr gazni tejash imkonini bergan.

Shu yilning o‘zida mahallalarni obod qilish, bog‘cha, maktab, tibbiyot, yo‘l, suv, elektr kabi infratuzilmani yaxshilash uchun byudjetdan 31,5 trillion so‘m ajratilgan. Bunga yana 1,5 trillion so‘m ajratilishi belgilandi.

Ta’kidlanishicha, yil boshidan buyon 18 ming 600 ta yangi xonadon qurilib, foydalanishga topshirilgan.

O‘tgan olti oyda 26 mingta oilaga 7 trillion so‘mga yaqin ipoteka krediti ajratilgan. Ular bo‘yicha boshlang‘ich to‘lov va foizni qoplash uchun 545 milliard so‘m subsidiya berilgan.

Shu bilan birga, faoliyatida tizimli kamchiliklarga yo‘l qo‘ygan 28 ta tuman-shahar hokimiga nisbatan intizomiy jazo choralarini ko‘rish, Qorao‘zak, Taxiatosh, Uchquduq, Toshkent, Furqat, Gurlan, Mirzaobod, Yangiariq, Mingbuloq tumanlari, G‘ozg‘on shahri hokimlarini ishdan olish bo‘yicha Bosh vazir A.Aripovning taklifi qo‘llab-quvvatlandi.

Shuningdek, birinchi yarim yillikda jami kapital quyilmalar 229 trillion so‘mni tashkil qilganini ta’kidlandi. Shundan 15,5 milliard dollari xorijiy investitsiya hisoblanadi.

• Shavkat Mirziyoyev
• Videoselektor