Ayni paytda Prezident Shavkat Mirziyoyev raisligida o‘tayotgan videoselektor yig‘ilishida davlat rahbari “mahallabay” ishlashning yangi tizimini yo‘lga qo‘yish bilan bog‘liq masalalar haqida gapirar ekan yangi yildan 9 ming 309 nafar hokim yordamchilari ish boshlagani va ularga ko‘mak berish uchun vazirliklardan 300 nafar rahbar-xodimlar xizmat safariga yuborilgani aytildi.

Qayd etilishicha, endilikda hokim yordamchilari, eng avvalo, ishlash imkoniyati va xohishi bor, lekin sharoiti og‘ir oilalarni o‘qitish va o‘z ishini boshlashi uchun imtiyozli kredit, subsidiya yoki dehqon xo‘jaligi uchun ularga yer maydonlari ajratish masalalari bilan shug‘ullanadi.

Hokim yordamchilari aholi bilan har kuni ishlab, odamlarga davlat tomonidan yaratilgan moliyaviy imkoniyatlarni yetkazishi, tadbirkorlikka va dehqonchilikka o‘rgatish orqali ularni kambag‘allikdan chiqarishi lozim.

Yig‘ilishda ma’lum qilinishicha, bu maqsadlar uchun joriy yilda 10 trillion so‘m imtiyozli kredit va 2,5 trillion so‘m subsidiya ajratiladi (har bir mahallaga o‘rtacha 1,3 milliard so‘m).

Davlat rahbari hokim yordamchilari prezidentning mahalladagi vakili ekanini ham ta'kidladi:

– “Ularning asosiy vazifasi – o‘z mahallasida tadbirkorlikni rivojlantirish, ish o‘rni yaratish,  kambag‘allikni qisqartirish va oilalar daromadini ko‘paytirishdan iborat.

Buning uchun, hokim yordamchilari har qanday byurokratiyadan xoli bo‘lishi, hech qaysi hokim yoki rahbar ularni majlislarga chaqirmasligi, turli hisobotlar bilan “ko‘mib tashlamasligi” lozim. Hokimlar ular uchun faqat sharoit yaratib berishi kerak", dedi Prezident.

• Mahalla
• O‘zbekiston
• Prezident