Prezident Shavkat Mirziyoyev ishtirokida bo‘lib o‘tayotgan videoselektor yig‘ilishida davlat rahbari kardiologiya sohasidagi muammoli masalalar to‘g‘risida to‘xtalib o‘tdi.

–  30-70 yoshdagi aholi o‘rtasida o‘lim holatlarining 53 foizi hanuzgacha yurak-qon tomir kasalliklariga to‘g‘ri kelmoqda. 
So‘nggi besh yilda yurak-qon tomir kasalliklari 20 foizga, hatto yoshlar orasida ham ko‘paygan. 40 yoshdan yuqori aholining 20-25 foizida gipertoniya alomatlari mavjud.  

Umuman, o‘tkazilgan xatlovlar natijasiga ko‘ra, respublika bo‘yicha 4 millionga yaqin aholi orasida yurak-qon tomir kasalliklari aniqlangan bo‘lib, umumiy aholining 12 foizini tashkil etadi.

Ayniqsa, bunday kasalliklarga chalingan aholi soni Namanganda – 18 foiz (450 ming nafar), Farg‘onada – 17 foiz (600 ming), Buxoroda – 14 foiz (230 ming), Qashqadaryoda – 13 foiz (470 ming)ni tashkil etib, respublika ko‘rsatkichidan yuqori, – dedi davlat rahbari.

Mirziyoyev shuningdek, Toshkent shahri, Buxoro, Navoiy va Toshkent viloyatlarida yurak-qon tomir kasalliklarining og‘ir asoratlari qolgan hududlarga nisbatan balandligini ta’kidladi.

Davlat rahbari bugungi yig‘ilishda kardiologiya bilan birga endokrinologiya masalalari ham muhokama qilinishi kerak bo‘lgani holda bu masala kun tartibidan chiqarib tashlanganini va buning sabablarini ma’lum qildi.

–  Bugungi yig‘ilishda kardiologiya bilan birga endokrinologiya masalalari ham muhokama qilinishi lozim edi.
Lekin, Endokrinologiya markazining yangi binosi, rahbari kabi masalalar hanuzgacha yechimini topmagani uchun yig‘ilish kun tartibidan chiqarib yuborildi.

Vazirlar Mahkamasidagi sohaga mas’ul xodim lavozimidan bo‘shatildi, – dedi Mirziyoyev.

• Prezident