Prezident Mirziyoyev O‘zbekiston Qahramoni Lola Murotovaning vafoti munosabati bilan taʼziya bildirdi.

“Mamlakatimiz qishloq xo‘jaligi og‘ir judolikka uchradi.

Mashhur fermer, Farg‘ona viloyatining Oltiariq tumanidagi “Nurli obod” fermer xo‘jaligi rahbari, O‘zbekiston Qahramoni, O‘zbekiston Respublikasi Oliy Majlisi Senati aʼzosi, taniqli jamoat arbobi Lolaxon Murotova og‘ir kasallikdan so‘ng shu yil 30 may kuni 64 yoshida vafot etdi”, – deyiladi taʼziyanomada.

Shuningdek, taʼkidlanishicha, butun mamlakatning g‘urur va iftixori bo‘lgan Lolaxon Murotova 1958 yil 9 martda Farg‘ona viloyatining Oltiariq tumanida tug‘ilgan. O‘rta maktabni tugatganidan so‘ng mehnat faoliyatini Oltiariq tumanidagi “Nurobod” jamoa xo‘jaligida mexanizator sifatida boshlagan, o‘z hayotini mamlakat iqtisodiyotining yetakchi tarmog‘i bo‘lgan qishloq xo‘jaligi bilan bog‘lagan.

Yoshlik yillaridan boshlab dehqonchilik ilmini puxta o‘rgangan L. Murotova jamoa xo‘jaligida bosh pudratchi, bo‘lim boshlig‘i, xo‘jalik raisi kabi lavozimlarda fidokorona mehnat qilib, ishni tashkil etish, mo‘l hosil yetishtirish, xo‘jalikni samarali boshqarish sohasida katta tajriba orttirgan.

Fermerlik harakatiga keng yo‘l ochilishi bilan mohir va mirishkor dehqon mamlakatimizda birinchilardan bo‘lib “Nurli obod” fermer xo‘jaligiga asos soldi hamda yerning haqiqiy egasi sifatida yurtimizda fermerlik harakatini rivojlantirish va uni yangi bosqichga ko‘tarishga katta hissa qo‘shgan.

“O‘z faoliyatida doimo yangilikka intilib, ezgu tashabbuslari bilan barcha fermerlarga, ayniqsa, yoshlarga ibrat bo‘lib yashagan L.Murotova Yangi O‘zbekiston sharoitida alohida jonbozlik va g‘ayrat-shijoat ko‘rsatib ishladi. Qishloq xo‘jaligi sohasida ilg‘or agrotexnologiyalarni, boshqaruvning zamonaviy usullari va samarali vositalarini qo‘llash, yer va suv resurslaridan oqilona foydalanish, yosh fermerlar avlodini tarbiyalashda o‘ziga xos tajriba maktabini yaratdi.

U o‘z foliyati bilan Vatanga muhabbat va sadoqatning, kasbiga fidoiylikning haqiqiy namunasini namoyon etdi. Aynan ana shunday olijanob fazilatlari bilan Lolaxon opa butun xalqimiz uchun o‘zbek ayolining haqiqiy timsoliga aylandi”, – deyiladi hamdardlik xatida.

Taʼziyanomada, shuningdek, Lola Murotovaning jamoat ishlarida ham faol ishtirok etgani, uning bu boradagi serqirra faoliyati yoshlarni, xotin-qizlarni zamonaviy kasb-hunarlarga o‘rgatish, ularni ish bilan taʼminlash, hayotda o‘z o‘rnini topishida yaqindan ko‘mak berish, ehtiyojmand oilalarni har tomonlama qo‘llab-quvvatlash, qishloq va mahallalarni obod etish, aholi turmush sharoitini yaxshilashga qaratilgan ezgu ishlarida yaqqol namoyon bo‘lgani taʼkidlanadi.

“Atoqli fermer, qishloq xo‘jaligi ilmining yetuk namoyandasi, taniqli jamoat arbobi, yoshlarning mehribon ustozi, kamtarin va samimiy inson, xalqimizning fidoyi farzandi Lolaxon Murodovaning yorqin xotirasi qalblarimizda hamisha saqlanib qoladi”, – deyiladi O‘zbekiston Prezidenti Sh. Mirziyoyev, Senat Raisi T.Norboyeva, Qonunchilik palatasi Spikeri N.Ismoilov, Bosh vazir A.Aripov, Bosh vazir o‘rinbosari Sh.G‘aniyev, Farg‘ona viloyati hokimi X.Bozorov hamda O‘zLiDeP rahbari A.Hayitovlar imzolagan taʼziyanomada.

• Prezident
• Qahramon
• Taʼziya