Prezident Shavkat Mirziyoyev raisligida sanoat kooperatsiyasini rivojlantirish va ishlab chiqarishni mahalliylashtirish chora-tadbirlari yuzasidan videoselektor yig‘ilishi bo‘lib o‘tmoqda.

Mazkur yig‘ilishda yangi bozorlarga kirish uchun mahalliy sanoatga xalqaro standartlarni keng joriy qilish zarurligi qayd etilgan.

Misol uchun, 2019-2021-yillarda 2 mingta eksportchi xalqaro sertifikatlar olgani hisobiga ularning eksporti 1,5 barobarga (590 million dollardan 920 million dollarga) oshdi.

Shu bois, “O‘zstandart” agentligiga 2022-yilda:

- to‘qimachilik sanoatida 150 ta;
- elektrotexnikada 50 ta;
- oziq-ovqat sanoatida 200 ta korxonada xalqaro sertifikatlarni joriy qilish vazifasi qo‘yildi.

Ta’kidlanishicha, buning uchun 1-mayga qadar har bir viloyatdagi Loyiha ofislari huzurida kamida ikkitadan Xalqaro standartlarni o‘rgatish markazlarini tashkil etish topshirilgan.

Bunda, hududlarning ixtisoslashuviga qarab, ularga xorijiy mutaxassislarni olib kelish va mahalliy korxonalarga xalqaro standartlarni o‘rgatish boshlanadi.

Shuningdek, joriy yil 1-iyunga qadar to‘qimachilik sanoatida 2 ta, elektrotexnikada 1 ta, oziq-ovqat sanoatida 3 ta laboratoriya tashkil qilish vazifasi qo‘yildi.

Qayd etilishicha, yig‘ilishda qurilish materiallari sohasida 2022-yilda 28 trillion so‘mlik mahsulot ishlab chiqarish hamda 600 million dollarlik eksportni ta’minlash zarurligi ta’kidlangan.

Bundan tashqari, mutasaddilar viloyat hokimlari bilan birga 2022-yilda 1,8 milliard dollarlik 420 ta yirik loyihani amalga oshirishi shartligi ko‘rsatib o‘tilgan.

1-iyulga qadar 150 million dollar, yil yakuniga qadar yana 300 million dollar mablag‘larni jalb etib, sohadagi investitsiya loyihalarini muddatida moliyalashtirishni tashkil etish zarurligi aytib o‘tilgan. 

• Prezident
• Shavkat Mirziyoyev
• “O‘zstandart” agentligi