Bugun, 26-aprel kuni Shavkat Mirziyoyev raisligida turizm xizmatlari ko‘lamini kengaytirish va infratuzilmasini rivojlantirish bo‘yicha videoselektor bo‘lib o‘tmoqda.

Ayni vaqtda davom etayotgan videoselektorda davlat rahbari “Andijon polkasi” raqsini YUNESKO nomoddiy madaniy meros ro‘yxatiga kiritish tashabbusini qo‘llab-quvvatladi.

Qayd etilishicha, bu yil “Andijon polkasi” – o‘zbek xalq cholg‘u kuyi va raqsining 100 yilligi keng nishonlanadi. Bu raqs nafaqat andijonliklarning, balki  ko‘pmillatli O‘zbekistonning eng sevimli va jo‘shqin raqslaridan biri hisoblanadi. Milliy kuy va raqsning eng yaxshi  an’analarini aks ettiradigan “Andijon polkasi” ohanglari bilan butun avlodlar ulg‘aygan, odamlarning xursandchilik xotiralari shu raqs bilan bog‘langan, har bir xonadondagi to‘y-hashamning eng avj nuqtasi shu sho‘x kuy va raqssiz o‘tmaydi. 

Videoselektorda “Andijon polkasi” har jihatdan jahon madaniy merosi deb atashga loyiq ekanligi, uni YUNESKO nomoddiy madaniy meros ro‘yxatiga kiritish bo‘yicha taklif berish tashabbusi o‘rtaga tashlandi.

Davlat rahbari ushbu tashabbusni qo‘llab-quvvatladi.

Eslatib o‘tamiz, avvalroq ijtimoiy tarmoqlarda Andijon viloyati hokimining “kim o‘zini haqiqiy andijonlik deb bilsa, har kuni Andijon polkasiga raqsga tushishi kerak” degan mazmundagi topshirig‘i aks etgan “Xabarnoma”si tarqalgan edi.

• Andijon polkasi
• Prezident
• Shavkat Mirziyoyev
• Videoselektor