Davlat xavfsizlik xizmatining hududlar boʻyicha boshqarmalari hamda viloyatlar prokuraturalari tomonidan bir nechta mulozimlarning jinoyat sodir etgani aniqlangan.

Xusussan, Navoiy viloyat prokuraturasi noziri firibgarlik yoʻli bilan mahalliy fuqarodan 10 mln. soʻm olgan vaqtida ushlangan.

Aniqlanishicha, nozir oʻzining tanishlari imkoniyatlari orqali uni Navoiy shahar hokimligi uy-joy va yotoqxonalardan foydalanish boshqarmasi tasarrufidagi yotoqxonalardan biriga navbatsiz joylashtirib qoʻyishni vaʼda qilgan.

Jinoyat ishlari boʻyicha Doʻstlik tuman sudining xodimi esa Sharof Rashidov tumanida yashovchi, muqaddam sudlangan shaxs bilan birga, Jizzax shahrida yashovchi fuqaroning nikohdan ajratish haqidagi daʼvosini fuqarolik ishlari boʻyicha sudda ishlaydigan tanishlari orqali uning foydasiga ijobiy hal qilib berish evaziga 4 ming AQSh dollari talab qilib, oldindan 2 ming AQSh dollari olgan vaqtlarida DXX va prokuratura xodimlari tomonidan ushlangan.

Muqaddam firibgarlik jinoyati uchun sudlangan Guliston shahridagi Advokatlar hayʼati advokati 2021 yilda mahalliy masʼuliyati cheklangan jamiyatga bankdan 240 ming AQSh dollari miqdorida kredit ajratilishida yordam berganligi uchun xizmati evaziga uning rahbaridan 12 ming AQSh dollari olgan.

Biroq, bank tomonidan olib borilgan monitoring jarayonida masʼuliyati cheklangan jamiyat kredit mablagʻini maqsadsiz ishlatganligi aniqlanib, prokuratura organlari tomonidan uning rahbariga nisbatan jinoyat ishi qoʻzgʻatilgan.

Shu bilan birga, Sirdaryoda advokat muqaddam olgan 12 ming AQSh dollaridan 1 000 AQSh dollarini MChJ rahbariga qaytarib bergan vaqtida ashyoviy dalillar bilan ushlangan.

Bundan tashqari, Milliy Gvardiyaning Samarqand viloyat Qoʻriqlash boshqarmasi Ishtixon tumanlararo qoʻriqlash boʻlimida qorovul lavozimida ishlovchi shaxs oʻzining qarindoshiga muqaddam hokimlik tomonidan bogʻdorchilik qilish uchun berilgan 70 sotix yer maydonini xaridorga 175 ming AQSh dollariga sotishga kelishib, oldindan 100 ming AQSh dollari olgan vaqtida ushlandi.

Maʼlum qilinishicha, hozirda barcha holatlar yuzasidan mazkur shaxslarga nisbatan Jinoyat Kodeksining 168- (Firibgarlik) va 211- (Pora berish) moddalari bilan jinoyat ishlari qoʻzgʻatilib, tergov harakatlari olib borilmoqda.

• Advokat
• DXX
• Prokuratura
• Sud