“Vladimir Putin Rossiya prezidenti saylovida kamida 31,6 millionta ovozni soxtalashtirish yoʻli bilan qoʻlga kiritgan” – deya yozmoqda “Novaya gazeta Yevropa” matematik Sergey Shpilkin usulidan foydalanib.

Ushbu usul byulletenlarni qoʻshib qoʻyish va yakuniy bayonnomalarni qayta yozish orqali gʻolib nomzodga nechta ovoz qoʻshilganini koʻrsatib beradi. Buning uchun muayyan bir uchastkada ovozlarning turli nomzodlarga taqsimlanishi bu yerga kelib ovoz bergan jami saylovchilar soni bilan taqqoslanadi.

Nashr hisob-kitoblariga koʻra, Rossiyada joriy prezident saylovlarida ovozlarni qalbakilashtirish koʻlami rekord darajada boʻlgan. Ayni vaqtda nashr ovoz berishga kelgan saylovchilar soni boʻyicha rasmiy maʼlumotlarga tayandi, ularning ishonchliligini tekshirish imkoni yoʻq.

Saylovda elektron tarzda ovoz berishni hisobga olmaganda, rasmiy maʼlumotlarga koʻra, 74,5 million kishi qatnashgan. Markaziy saylov komissiyasi daʼvo qilishicha, ularning 64,7 millioni Putinga ovoz bergan. MSK byulletenlarning 100 foizi hisoblab chiqilgach, Putin 87,28 foiz ovozlarni qoʻlga kiritganini maʼlum qilgandi.

• Putin
• Rossiya
• saylov