Vladimir Putin bu haqda MDH davlatlari rahbarlarining norasmiy sammiti doirasida Tojikiston prezidenti Emomali Rahmon bilan alohida uchrashuvda ma’lum qildi.

“Ikki tomonlama uchrashuvimizni sizga va bir necha kun oldin halok bo‘lgan tojikistonlik bolaning oila a’zolariga samimiy hamdardlik so‘zlari bilan boshlamoqchiman. Bolalarga nisbatan terakt sodir etilishi – jirkanch jinoyatdir. Shak-shubhasiz, tergov oxiriga yetkaziladi va aybdorlar, agar ular bir necha kishi bo‘lsa, albatta, to‘liq jazoga tortiladi. Yana bir bor takrorlayman: bu jinoyat meni dahshatga soldi”, — dedi Putin.

16-dekabr kuni to‘qqizinchi sinf o‘quvchisi Timofey K. Moskva viloyatining Gorki-2 aholi punktidagi o‘zi o‘qiydigan maktabga pichoq ko‘tarib borgan va o‘quvchilarga hujum qilgan. U maktab qo‘riqchisini yaralagan va 10 yoshli Qobiljon Aliyevni o‘ldirgan. Timofey K. o‘zi tomonidan olingan videoda o‘quvchilardan qaysi millatdan ekanini so‘ragani aks etgan. Uning egnida ommaviy qotilliklarga ishora qiluvchi yozuvlar aks etgan ekipirovka bo‘lgan. Timofeyga nisbatan qotillik va suiqasd bo‘yicha ayblovlar qo‘yilgan. Sud uni ikki oy muddatga hibsga olgan.

• Emomali Rahmon
• Hamdardlik
• Prezident
• Putin
• Rossiya
• Tojikiston