Rossiya Federatsiyasi Prezidenti Vladimir Putin taklif qilayotgan Rossiya, Qozog‘iston, O‘zbekiston ittifoqi gaz bo‘yicha bo‘lib, unda Rossiya gazini Qozog‘iston va O‘zbekiston hududlari orqali tashish bo‘yicha harakatlarni muvofiqlashtirish maqsad qilinyapti. Bu haqda Qozog‘iston Respublikasi Prezidenti Matbuot kotibi Ruslan Jeldibay ma’lum qildi.

Tushuntirilishicha, kecha, 28-noyabr kuni Rossiya Federatsiyasi Prezidenti Vladimir Putin va Qosim-Jomart To‘qayev o‘rtasida bo‘lib o‘tgan uchrashuv yakunida Putin To‘qayevga Rossiya, Qozog‘iston, O‘zbekiston ittifoqini tuzishni taklif qilgan. Qozog‘iston rahbari bu haqda gapirarkan, gap aynan qanday ittifoq haqida ketayotganiga aniqlik kiritmagan.

Mana shuning uchun ham, bu ijtimoiy tarmoqlarda ko‘plab noroziliklar, jamoaviy bahslarga sabab bo‘lgan. Tarmoqlarning qozoq va o‘zbek segmentida jamoatchilik faollari Rossiya bilan ittifoqqa kirishga qarshi chiqishni boshlagan.

“Gap Rossiya gazini Qozogʻiston va Oʻzbekiston hududlari orqali tashish boʻyicha harakatlarni muvofiqlashtirish maqsadida Rossiya, Qozogʻiston va Oʻzbekistondan iborat “uch tomonlama gaz ittifoqi”ni yaratish haqida ketayotgan edi”,- deya tushuntirdi Qozogʻiston rahbari vakili.

Putin va To‘qayev barcha tomonlar manfaatlarini hisobga olgan holda oqilona yechim topish uchun ekspertlar ishtirokida batafsil uch tomonlama maslahatlashuvlar o‘tkazish zarurligiga kelishib oldilar, deya qo‘shimcha qildi Jeldibay.

• O‘zbekiston
• Qozog‘iston
• Rossiya