Ijtimoiy tarmoqlarda Qamashi tumani Sartuldi qishlog‘ida joylashgan 15-umumiy o‘rta ta’lim maktab filiali holatining videolavhasi keng muhokamalarga sabab bo‘ldi.

Videotasvirda fuqaro mazkur maktab filialining yaroqsiz holatga kelib qolganini, bolalar sovuqda dars o‘tayotganini, shu sababli esa qishloqqa yangi maktab zarurligini aytadi.

Qamashi tuman hokimligi mazkur holat yuzasidan munosabat bildirdi.

Ma’lum bo‘lishicha, ushbu qishloqda 37 ta xonadon mavjud. Qishloqda 41 nafar bolalar maktab yoshida. Ularning aksariyati 15 maktabning asosiy qismida tahsil olishadi. Faqatgina 4 nafar bolajonlar maktab filialida ta’lim olib kelmoqda. Tarqalgan videoda bolalar soni 11 nafarni tashkil qilgan.

Tuman hokimligi Matbuot xizmatiga ko‘ra, holat yuzasidan Qashqadaryo viloyati va tuman XTB hamda hokimlik mas’ullari ishtirokida joyida o‘rganish olib borilgan.

Mas’ullarni axborotiga ko‘ra, filial maktabda jami 4 nafar (2-sinfda 1 nafar, 3- sinfda 1 nafar, 4-sinfda 2 nafar) o‘quvchilar ta’lim-tarbiya olib kelmoqda. Ushbu qishloqdagi filial maktab komplekt-sinf ko‘rinishida shakllantirilgan.

Qayd etilishicha, Sartuldi qishlog‘ida joylashgan 15-sonli filial maktabdan asosiy maktabgacha bo‘lgan oraliq masofa 12 km. ni tashkil etadi.

Mutasaddilar tomonidan holat o‘rganildi va maktab filiali binosi foydalanishga yaroqsiz deb topilib, yopildi.

4 nafar bolalarning asosiy maktabda o‘qishi uchun esa tuman hokimligi hisobidan avtotransport vositasi qatnovi yo‘lga qo‘yilishi belgilandi.

Shuningdek, aholining demografik o‘sishini hisobga olib 2023-yilda ushbu hududda 60 o‘rinli maktab qurilishi uchun investisiya dasturiga taklif kiritilishi ma’lum qilindi.  

• Maktab
• Qashqadaryo