Joriy yil avvalida Qarshi shahrining markaziy maydonlarining birida flagshtok (ulkan bayroq ustuni) qurish haqida xabar tarqalgan va bu jamoatchilik o‘rtasida ayri me’tirozlarni keltirib chiqargan edi. 

Yaqinda ijtimoiy tarmoqlarda Qarshi shahrida o‘rnatilishi to‘xtatilgan bayroq ustuni qayta bunyod etiladi, degan mazmunda  xabarlar tarqaldi. 

Bunga munosabat tarzida Qarshi shahar hokimligi o‘rnatiladigan bayroq ustunining qurilish ishlari shahar mahalliy byudjetining 2021-yilning III-chorak yakuni bo‘yicha daromadlar rejasining oshirib bajarilgan qismidan ajratilgan mablag‘lar hamda homiylik yordami hisobiga davom ettirilishini ma’lum qilgan edi.

Qarshi shahar hokimligi Matbuot xizmatining ma’lum qilishicha, ko‘plab muhokamalarga sabab bo‘lgan ushbu masalaga viloyat hokimi e’tibor qaratib, shahar hokimi bilan kelishgan holda ulkan bayroq ustuni qurilmaydigan bo‘ldi.

Qayd etilishicha, daromadlar rejasining oshirib bajarilgan qismidan qolgan mablag‘lar ichki yo‘llar ta’miri va kommunal sohalarni rivojlantirishga yo‘naltiriladi. 

• Qarshi
• Qashqadaryo