Qashqadaryo viloyatining Qarshi tumanida voyaga yetmagan o‘smir mashina boshqarib, halokatga uchradi. Mashina ichida bo‘lgan sheriklaridan ikki nafari hodisa joyida vafot etdi. Bu haqda “Hudud” dasturida ma’lum qilindi.

Bildirishicha, joriy yilning 19-aprel kuni Qarshi tumani “Qozikent” mahallasida 14 yoshli voyaga yetmagan bola o‘z otasining mashinasini ruxsatsiz olib chiqqan va halokatga uchragan. Oqibatda avtomashina ichida bo‘lgan uning ikki nafar do‘sti voqea joyida halok bo‘lgan.

Qayd etilishicha, mashina salonida jami 5 kishi bo‘lgan. 2011-yilda tug‘ilgan maktab o‘quvchisi Gentra rusumli mashinani tez haydashi oqibatida boshqaruvni yo‘qotgan va yo‘l chetida to‘xtab turgan yuk mashinasiga borib urilgan.

Ma’lum qilinishicha, mazkur holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi bilan jinoyat ishi qo‘zg‘atilgan va ayni damda Qarshi tuman ichki ishlar organlari tomonidan surishtiruv harakatlari olib borilmoqda.

• Qashqadaryo
• YTH