Gidrometeorologiya xizmati 21-dekabr, ya’ni bugun shamol tezligi ba’zi joylarda 25-28 metr/sekundgacha kuchayib, Qoraqalpog‘iston, Xorazm, Buxoro, Navoiy viloyatlarida va respublikaning cho‘l hududlarida chang bo‘roni va g‘uborlar ko‘tarilishi  mumkinligini prognoz qilgan edi.

Ayni paytda Qashqadaryo viloyatining ayrim hududlarda ushbu tabiat hodisasi kuzatilmoqda.

Sog‘liqni saqlash vazirligi mazkur holatda aholiga tibbiy yordam ko‘rsatish uchun barcha zarur choralar ko‘rilganini ma’lum qildi.

Jumladan, Respublika shoshilinch tibbiy yordam ilmiy markazi va uning hududlardagi 13 ta filiali hamda 179 ta aholi punktida joylashgan subfiliallari domiy shay holatga keltirilgan.

Bundan tashqari, mamlakat bo‘ylab 2 861 ta tez tibbiy yordam brigadasi zarur dori-darmonlar bilan yetarli miqdorda to‘liq ta’minlangan. Shoshilinch va tez tibbiy yordam tizimida faoliyat ko‘rsatayotgan qariyb 17 ming nafarga yaqin  shifokor va 52 ming nafardan ziyod hamshiralarga zarur ko‘rsatmalar berilgan.

Qolaversa, vazirlik “1003” qisqa raqamli  Sall-markazi orqali changli havodan qanday himoyalanish bo‘yicha tunu kun kerakli maslahat va tavsiyalar olishlari mumkinligi haqida ogohlantirmoqda.

Vazirlik nafas yo‘li surunkali kasalliklari bor aholi vakillarini changli havoda tashqariga chiqmasligini tavsiya qilmoqda.

Shuningdek, aholiga derazalarni yopiq holda saqlash, ko‘proq suv ichish, tez-tez dush qabul qilish va ochiq havoda yurganda tibbiy niqob taqib yurish tavsiya etilmoqda.

• Qashqadaryo
• SSV