Qashqadaryo viloyati Kitob tumanidagi YPX postida 900 kg isteʼmolga yaroqsiz go‘sht olib ketayotgan haydovchi to‘xtatildi. Bu haqda Ichki ishlar vazirligi matbuot xizmati xabar berdi.

Qayd etilishicha, 15-mart kuni taxminan soat 21:10 da Qarshi – Samarqand yo‘nalishida harakatlanib kelgan Cobalt tumanda joylashgan “Mingchinor” muntazam YPX maskanida to‘xtatildi. Avtomashina haydovchisi bilan olib borilgan suhbat davomida salon va yukxona ko‘zdan kechirilganda kelib chiqishi nomaʼlum hayvonga tegishli bo‘lgan, hech qanday hujjatlarsiz 900 kilogramm go‘sht mahsuloti borligi aniqlandi.

Qayd etilishicha, aniqlangan go‘sht viloyat “Oziq-ovqat mahsulotlari xavfsizligi” laboratoriyasi xodimlari tomonidan tekshiruvdan o‘tkazilganda, isteʼmolga yaroqsizligi maʼlum bo‘ldi. Laboratoriya xulosasiga ko‘ra sifatsiz go‘sht mahsuloti tegishli tartibda yo‘q qilindi.

Holat yuzasidan haydovchiga nisbatan Maʼmuriy javobgarlik to‘g‘risidagi kodeksning 109-moddasiga asosan maʼmuriy bayonnoma tuzilib, tegishli jazo qo‘llangan.