Qashqadaryo viloyatining Yakkabog‘ tumanida yashovchi fuqaro 2019-2022-yillarda Rossiyada mehnat migranti bo‘lib ishlagan davrida internet orqali terroristik tashkilotlar va diniy ekstremistik oqimlar g‘oyaviy rahnamolari bo‘lgan Abdulloh Zufar, Abdulloh Buxoriy, Sodiq Samarqandiy, Mahmud Abdulmo‘min va boshqalarning “hijrat” va “jihod” qilishga, islomiy davlat qurishga chorlovchi ma’ruzalari ta’siriga tushib qoladi.

So‘ngra u Instagram’da aqidaparastlik materiallarni tarqata boshlaydi.

Shuningdek, u Telegram'da ham “Hizb ut-Tahrir” tashkiloti vakillari bilan aloqa o‘rnatib, tashkilot g‘oyalari singdirilgan va amaldagi davlat tuzumini Konstitutsiyaga xilof tarzda o‘zgartirishga xizmat qiluvchi materiallarni targ‘ib qilish bilan shug‘ullanadi.

Youtube orqali ham “Hizb ut-Tahrir”ning targ‘ibotchisi bilan bog‘lanib, uning faoliyatini faollashtirish uchun bank ilovasi orqali pul mablag‘i yuboradi.

O‘zbekistonga qaytib kelganidan keyin ham u g‘ayriqonuniy harakatlarini davom ettirgan.

Huquqni muhofaza qiluvchi idoralar xodimlari tomonidan olib borilgan tezkor qidiruv tadbirlari natijasida ushbu fuqaroning noqonuniy faoliyatiga chek qo‘yilgan.

Jinoyat ishlari bo‘yicha Yakkabog‘ tuman sudining hukmi bilan, mazkur shaxs Jinoyat kodeksining 155-3, 159 va 244-1-moddalari bilan aybli deb topilib, unga nisbatan 6 yil muddatga ozodlikdan mahrum etish jazosi tayinlandi.

• DXX
• Diniy ekstremizm
• Qashqadaryo
• Telegram