Prezident Shavkat Mirziyoyev raisligida oʻtgan yigʻilishda qurilish va arxitektura nazorati tizimini qayta koʻrib chiqish masalasiga toʻxtalib oʻtildi.

“Ochiq aytish kerak, Qurilish inspeksiyasi tizimidagi 700 dan ziyod xodimlar samarali ishlamayapti. Inspeksiya oʻz faoliyatini koʻproq jarima qoʻllashdan iborat, deb hisoblaydi. Vaholanki, qurilishdagi kamchiliklarning 70 foizi bir-birini takrorlaydi va ularni bemalol oldini olish mumkin.

Inspeksiya joriy yilda qurilayotgan 31 mingta obyektni toʻliq kunlik nazorat qilish imkoniyatiga ega emas. Sababi, barcha nazorat ishlari “qoʻlda” olib boriladi. Xavfni oldindan tahlil qiladigan tizim haligacha joriy etilmagan”, dedi davlatimiz rahbari.

Shu bois, Inspeksiya faoliyati qayta koʻrib chiqilib, uning ishi, avvalo, qurilishdagi tizimli kamchiliklar va ularning sabablarini tahlil qilish hamda ularni bartaraf etishga qaratiladi. Bundan buyon:

- Qurilish vazirligi, viloyat, tuman va shaharlar bosh arxitektorlari “genplanlar” va master rejalar ustidan;

- Inspeksiya qurilish sifati, muddati va loyiha bilan amaldagi ishning mosligini nazorat qilishga masʼul boʻladi.

Yil yakuniga qadar qurilish obyektlarini roʻyxatga olishdan boshlab, foydalanishga qabul qilishgacha boʻlgan barcha jarayonlarni raqamlashtirish topshirildi.

Ushbu tizim orqali, har bir nazoratchi obyektni kim qurayapti, qanday material ishlatyapti, texnik nazoratni kim olib boryapti, ularning malakasi qanaqa, degan savollarga javob topa olishi kerak.

Ushbu maʼlumotlar asosida qurilayotgan obyektlar “xavf guruhlari”ga ajratilib, nazorat yoʻlga qoʻyiladi.

Buning uchun Inspeksiya maʼlumotlar bazasi standart, soliq va bojxona organlari bazalariga integratsiya qilinadi.

“Qatʼiy ogohlantiraman. Noqonuniy qurilish aniqlansa, viloyat, tuman va shahar hokimining qurilish boʻyicha oʻrinbosarlari Inspeksiya bilan birga tengma-teng javob beradi”, – dedi Prezident.

• Prezident
• Shavkat Mirziyoyev
• Videoselektor