Qirg‘izistonning Jalolobod viloyatida yana bir yerosti yo‘li topilgan, u orqali odamlar va kontrabanda tovarlari O‘zbekiston hududiga noqonuniy olib o‘tilgan. Bu haqda Qirg‘iziston IIV xabar qildi.

Qayd etilishicha, 5-aprel kuni O‘sh viloyati IIB xodimlari Qirg‘iziston chegarasini noqonuniy kesib o‘tgan O‘zbekiston fuqarosi 1984-yilda tug‘ilgan X.B.ni qo‘lga olishgan. Tekshiruv davomida u Qirg‘izistonga ikki davlatni bog‘laydigan yashirin tunnel orqali qonuniy chegarani chetlab o‘tgani ma’lum bo‘lgan.

Politsiya Qirg‘iziston Jinoyat kodeksining 168-moddasi “Noqonuniy migratsiyani tashkil etish, migrantlarni noqonuniy olib kirish” moddasi bo‘yicha jinoyat ishi ochgan.

12-aprelga o‘tar kechasi Nooken tumanida mahalliy fuqaro qo‘lga olingan. U Qirg‘iziston-O‘zbekiston chegarasini noqonuniy kesib o‘tishni pul evaziga tashkil qilganlikda gumonlanmoqda.

Politsiya ma’lumotlariga ko‘ra, qo‘lga olish chog‘ida gumonlanuvchidan maxsus belgili valyuta va tungi ko‘rish durbinlari musodara qilingan.

Shuningdek, uning uyidan dastlabki qiymati qariyb 30 ming dollarga teng 87 quti narkotik modda topilgan.

• Chegara
• Qirg‘iziston