Tojikiston chegara qo‘shinlari Davlat milliy xavfsizlik qo‘mitasi so‘nggi kunlardagi chegaraoldi hududi voqealariga munosabat bildirdi.
Rasmiy tomon bildirgan izohda qirg‘iz chegarachilari muntazam ig‘vogarlik maqsadida ish yuritayotganligi ta’kidlangan.
“Keyingi vaqtlarda Qirg‘iziston Respublikasi fuqarolari va chegarachilari tomonidan chegaradagi vaziyatni qaltislashtirishga olib keladigan voqealar uchramoqda”, – deb hujjatdan iqtibos keltiradi “Xovar” nashri.
Tojikiston chegara qo‘shinlari davlat milliy xavfsizlik qo‘mitasi ma’lumotriga ko‘ra, faqat 22-dekabrning o‘zida Qirg‘iziston bilan bog‘liq 3 ta hodisa yuz bergan. Jumladan, Lashx tumanidagi Chashma qishlog‘ida chegarani buzib o‘tayotgan Qirg‘iziston davlat raqamlari bo‘lgan “Opel” rusumli avtomobil to‘xtatilganda, uning ichida to‘rt nafar qurollangan qirg‘iz chegarachilari bo‘lgan.
“Chegarani noqonuniy kesib o‘tish va Tojikistonga bostirib kirish haqida suhbat va tushuntirish asnosida qirg‘iz chegarachilari ularga rahbariyat tomonidan shunday topshiriq berilganini aytishdi. Avval qabul qilingan kelishuv doirasida qirg‘iz chegarachilari Qirg‘iziston hududiga qaytarilgan” – deb ta’kidlangan Tojikiston tomoni bayonotida.
Boshqa g‘ayriqonuniy harakat Sug‘d viloyati Xistevar aholi istiqomat hududida kuzatilgan. Bunda Qirg‘iziston davlat raqamli benzin tashuvchi mashina chegara hududida to‘xtamasdan, Tojiston tomon harakat qilgan. Haydovchi tojik chegarachilarining to‘xtash haqidagi talabiga quloq solmasdan, aksincha, tezlikni oshirgan va chegarachilarni bosib ketishiga oz qolgan.
“Ko‘rilgan chora natijasida (qanday chora ekanligi aytilmagan) yuk mashinasi to‘xtatilgan, haydovchi qo‘lga olingan” – deb voqea tafsilotlari beriladi munosabatda.
O‘sha kunning oqshomida esa qo‘shni mamlakat fuqarolari Qirg‘iziston Mayskiy qo‘rg‘onidan Sug‘d viloyati, Isfara shahri Somoniyon qishlog‘iga quroldan o‘t ochganlar. Bunda oynalar singan.
“Bo‘lib o‘tgan barcha voqealar yuzasidan ikki davlat chegara vakillari doirasida xizmat uchrashuvlari o‘tkazildi” – ta’kidlanadi hujjatda.
O‘z navbatida qirg‘iz ommaviy axborot vositalarida KamAZ mashinasi bilan bog‘liq voqea boshqacha tasvirlangan. Ularda aytilishicha, tojik chegarachilari suv tashiydigan (benzin emas) mashina haydovchisiga o‘t ochishgan.
“Tojikiston Respublikasi chegarachilari vakillari tojik chegarachilari harakatini noqonuniyligi ular tomondan qurolning ishlatilishi adolatdan bo‘lmaganini to‘liq tan olishdi” – deb aytilgan Qirg‘iziston chegara qo‘shinlari xizmatida.
Eslatib o‘tamiz, Sovet ittifoqi qulashi ortidan Qirg‘iziston va Tojikiston o‘rtasidagi bahsli hududlardagi masalalar hamon hal etilmagan. 30 yildirki, chegaradagi delimitatsiya va demarkatsiya ishlari yakunlamagan, 976 kilometrli chegara chizig‘idan faqat 520 kilometri ikki davalt tomonidan rasmiylashtirilgan.
Tojik-qirg‘iz chegarachilari o‘rtasidagi yirik to‘qnashuvning so‘nggisi joriy yilning 28–29-aprelda ro‘y bergan. Qurolli to‘qnashuvda ikkala tomondan 55 nafar kishi halok bo‘lgan va 300 dan ortiq kishi jarohatlangan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!