Qirg‘iziston hukumati Qozog‘istonda bo‘lgan va o‘z vataniga qaytish istagida bo‘lgan vatandoshlarini evakuatsiya qilishni boshladi. Bu haqida Qirg‘iziston tashqi ishlar vazirligi xabar berdi.

“Hozirda Tashqi ishlar vazirligi vatandoshlarga konsullik-huquqiy yordam ko‘rsatish doirasida Qirg‘iziston-Qozog‘iston chegarasidagi nazorat-o‘tkazish punktlari orqali Qirg‘iziston fuqarolarini evakuatsiya qilish ishlarini olib bormoqda”, - deyiladi xabarda.

Ma’lumotlarga ko‘ra, hozirda ikki davlat chegarasida joylashgan nazorat-o‘tkazish punktlari ishlamoqda, zarurat tug‘ilganda vataniga qaytishni xohlovchi Qirg‘iziston fuqarolari chegaradan bemalol o‘tishlari mumkin.

“Qirg‘iziston Respublikasi Tashqi ishlar vazirligining Konsullik xizmati departamentida, Qirg‘izistonning Qozog‘istondagi elchixonasi va Qirg‘izistonning Olmaota shahridagi Bosh konsulligida “Ishonch telefonlari” mavjud bo‘lib, ular orqali Qirg‘iziston Respublikasining Qozog‘istondagi fuqarolari konsullik va huquqiy yordam to‘g‘risida barcha savollarini berishlari mumkin”, - deb xabar bergan vazirlik.

Shuningdek, Qirg‘iziston Tashqi ishlar vazirligi ham Qozog‘istondagi vatandoshlarini “mamlakatda bo‘lish qonunlari va qoidalariga rioya qilishga, ig‘vogarlikka yo‘l qo‘ymaslikka, hech qanday nizolarda qatnashmaslikka, jamoat joylariga bormaslikka” chaqirgan.

Xabarda keltirilishicha, Qirg‘iziston Respublikasining Qozog‘istondagi elchixonasi Nur-Sulton, Aqto‘be, Atirau, Aqtau, Qustanay, Ko‘kchatov, Petropavlovsk, Pavlodar va Qarag‘andadagi Qirg‘iziston fuqarolari bilan aloqa o‘rnatgan.

• Qirg‘iziston
• Qozog‘iston