Qirg‘iziston prezidenti Sadir Japarov jamoat joylarida yuzni yopadigan diniy liboslar kiyishni taqiqlovchi qonunni imzoladi.

Qirg‘iziston rahbarining ta’kidlashicha, bu masala juda bahsli hisoblanadi. Diniy qoidalarga ergashuvchilar Japarovdan qonunni e’tiroz bildirgan holda rad etishni so‘rashgan bo‘lsa, jamiyatning yana bir qismi esa uni imzolashni qat’iy talab qilgan.

“Jamiyat a’zolari notanish odamlarning xonadonma-xonadon yurib, eshiklarni taqillatishiga qarshi. Ular bu kezib yurgan targ‘ibotchilar kim ekanligi, ularning guvohnomasi bor-yo‘qligi, qanday tashkilot yoki yo‘nalishni targ‘ib qilayotgani va bu bizning dinimizga zid emasligini bilishni istaydilar”, – degan u.

Ushbu qonun bilan, shuningdek, psixologik yoki jismoniy zo‘ravonlik orqali diniy e’tiqodga majburlash, qariyalar uylarida, harbiy qismlarda yoki jazoni ijro etish muassasalarida diniy marosimlar o‘tkazish taqiqlanadi.

Qonunning alohida bandida jamoat joylarida, davlat va ma’muriy tashkilotlarda, maktabgacha ta’lim va umumiy ta’lim muassasalarida, shuningdek, turar-joy binolarini aylanib chiqish yo‘li bilan diniy adabiyotlarni tarqatishga taqiq kiritiladi.

 “Men bu masalaga oddiy fuqaro sifatida emas, balki mamlakat prezidenti sifatida yondashyapman. Biz faqat bugungi kun yoki shaxsiy manfaatlarimiz uchungina yashamasligimiz kerak”, – deya qo‘shimcha qildi Qirg‘iziston prezidenti.

• Qirg‘iziston
• Qonun
• Sadir Japarov
• taqiq