Qirg‘izistonda korrupsion jinoyatlar uchun sudlangan shaxslarga yuqori davlat lavozimlarida ishlashni umrbodga taqiqlashni taklif qiluvchi tegishli hujjat Jogorku Keneshda taqdim etildi. Bu haqda 24.kg ma’lum qildi.  

Ushbu qonun loyihasini deputat Jenishbek Toktorbayev ishlab chiqqan. Unda  davlat va mahalliy boshqaruv organlarida korrupsiyaga qarshi kurashni kuchaytirish nazarda tutiladi.  Loyihaga ko‘ra, korrupsioner fuqarolar sudlanganligi olib tashlangan yoki tashlanmaganidan qat’i nazar, prezident, parlament deputati yoki vazirlar mahkamasi a’zosi lavozimlarini egallash huquqiga ega bo‘lmaydi.

Shuningdek, Toktorbayev qabul qilingan choralarga qaramay, davlat organlarida korrupsiya darajasi hamon yuqori ekanini aytgan. Umrbod taqiq davlat apparatini “vijdonsiz amaldorlardan tozalash” va ularning keyingi korrupsion faoliyatining oldini olishga qaratilgan.

Qonun loyihasi orqali “Prezident va Jogorku Kenesh deputatlari saylovi to‘g‘risida”gi hamda “Vazirlar Mahkamasi to‘g‘risida”gi konstitutsiyaviy qonunlarga o‘zgartishlar kiritishni taklif etilmoqda.

• Japarov
• Korrupsiya
• Qirg‘iziston