Oliy Majlis Qonunchilik palatasidagi O‘zLiDeP fraksiyasining navbatdagi yig‘ilishida deputatlar kun tartibidagi birinchi masala sifatida “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasini birinchi o‘qishda ko‘rib chiqdi.

Mazkur hujjat bilan qator o‘zgartirish va qo‘shimchalar kiritilmoqda. Xususan, Senatning vakolatlari yangi tahrirdagi Konstitutsiyaga muvofiqlashtirilmoqda.

Unga ko‘ra, mahalliy davlat hokimiyati vakillik organlariga o‘z faoliyatini amalga oshirishda ko‘maklashish;

- Qonunchilik palatasi tarqatib yuborilgan davrda Oliy Majlisning qonunlarni qabul qilishga doir vakolatlarini bajarish;

- qonunni u Senatga kelib tushgan kundan eʼtiboran 60 kun ichida ko‘rib chiqish va boshqalar nazarda tutilmoqda.

Senat aʼzolari har bir maʼmuriy-hududiy birlikdan 4 nafardan saylanishi, 9 nafari prezident tomonidan tayinlanishi (jami 65 nafar) belgilanmoqda. Doimiy asosda ishlovchi senatorlar soni amaldagidek 25 nafar miqdorda saqlanib qolmoqda.

Shuningdek, Senatning prokuratura organlari faoliyati ustidan nazorat qiluvchi komissiyasini tugatish taklif etilmoqda.

Senatning quyidagi vakolatlari bekor qilinib, Qonunchilik palatasining mutlaq vakolatlari sifatida belgilanmoqda:

- Davlat budjetining ijro etilishi ustidan nazoratni amalga oshirish va Hisob palatasining hisobotini ko‘rib chiqish;

- Prezidentning taqdimiga binoan bosh vazir nomzodini ko‘rib chiqish va maʼqullash;

- Bosh vazir, hukumat aʼzolarining hisobotlarini hamda Vazirlar Mahkamasining har yilgi maʼruzasini eshitish.

Qonunchilik palatasi spikeri o‘rinbosarlari soni 7 tadan 2 taga qisqartirilmoqda. Bunda:

- Spikerning o‘rinbosarlari fraksiya aʼzosi bo‘lishi mumkin emasligi hamda lavozimda bo‘lish davrida siyosiy partiyadagi aʼzolikni to‘xtatib turishi belgilanmoqda;

- fraksiya rahbari moddiy, tibbiy va transport xizmati ko‘rsatish shart-sharoitlariga ko‘ra, spiker o‘rinbosariga tenglashtirilmoqda.

Qonunchilik palatasi va Senatning o‘zini o‘zi tarqatib yuborish vakolati kiritilmoqda. Bunday holatda Qonunchilik palatasiga yangi saylov 2 oy mobaynida oʻtkaziladi. Senatning yangi tarkibi esa 1 oy mobaynida shakllantiriladi.

Mazkur qonun loyihasining dolzarbligini inobatga olgan holda deputatlar tomonidan qo‘llab-quvvatlandi.

• Konstitutsiya
• Qonun
• Qonunchilik palatasi