Ijtimoiy tarmoqlarda tarqalgan “endi rulda boʻlgan holda telefonda gaplashishga ruxsat berildi” qabilidagi xabarlarga izoh berildi.

“Transport va moliya sohalaridagi ayrim huquqbuzarliklarni sodir etganlik uchun maʼmuriy jazolar liberallashtirilishi munosabati bilan Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartirish va qoʻshimchalar kiritish haqida”gi qonun qabul qilindi.

Mazkur qonunga muvofiq, haydovchilar transportni boshqarishda telefondan quloqchinlar orqali va qoʻllarini ishlatmasdan gaplashish imkonini beradigan uskunalar orqali foydalanishi mumkin boʻladi.

Avvalroq, ijtimoiy tarmoqlar orqali “endi mashina boshqarayotganda ham telefondan foydalanish mumkin” yoki “rulda boʻlgan holda telefonda gaplashishga ruxsat berildi” va shunga oʻxshash xabarlar tarqalgan edi. Mazkur holatga Adliya vazirligi matbuot kotibi quyidagicha izoh bergan:

Kiritilgan oʻzgartirishga koʻra, transport vositasini boshqarish vaqtida haydovchilarga telefondan faqat “bluetooth”, quloqchin va qoʻlni band qilmaydigan garnituralar orqali foydalanishga ruxsat berilgan. Lekin bu telefondan foydalanishga yoki gaplashishga ruxsat berildi degani emas.

Agarda haydovchilar rulda boʻlgan vaqtida telefondan “bluetooth”siz, quloqchinsiz va boshqa garnituralardan foydalansa javobgarlikka tortilishi maʼlum qilindi.

Bundan tashqari, transport vositasini boshqarish paytida mashina salonining old qismidagi monitorda videodasturlarni tomosha qilish ham javobgarlikka sabab boʻladi. Yaʼni Maʼmuriy javobgarlik toʻgʻrisidagi kodeksning 128-2 – moddasiga koʻra, BXM ning bir baravari, yaʼni, 270 ming soʻm miqdoridagi jarima solishga sabab boʻlishi qayd etilgan.

Shuningdek, salonning old qismidagi monitordan faqat yoʻnalishni aniqlash yoki uzoq manzilni yaqin qilish maqsadida “GPS” qurilma sifatida foydalanish mumkin.

• Adliya
• Qonun