“O‘zbekistonda “Qo‘qon biokimyo” zavodining 99,7 foiz aksiyalari sotiladi. Bu haqida Davlat aktivlarini boshqarish agentligi matbuot xizmati xabar berdi.

Davlat aktivlarini boshqarish agentligi “Qo‘qon biokimyo” korxonasi ustav kapitalidagi 99,7 foiz aksiyalar paketini muzokaralarga ommaviy taklif etish orqali sotilishini ma’lum qildi.

Deloitte xalqaro kompaniyasi ushbu bitim bo‘yicha agentlik maslahatchisi vazifasini bajaradi. UzAssets investitsiya kompaniyasi agentlik manfaatlari uchun va uning nomidan bitimga tayyorgarlik jarayonini amalga oshiradi.

Ma’lumotlarga ko‘ra, “Qo‘qon biokimyo” korxonasi 1983-yilda tashkil etilgan. Zavodning yillik ishlab chiqarish quvvati 4 million 020 ming dekalitrni tashkil etib, O‘zbekistondagi eng yirik etil spirti ishlab chiqaruvchisi hisoblanadi.

Shu bilan bir qatorda, “Qo‘qon biokimyo” aksiyadorlik jamiyatida ishlab chiqarilgan spirt organoleptik xususiyatlariga ko‘ra O‘zbekistondagi eng yaxshilaridan biri sifatida mutaxassislar tomonidan e’tirof etib kelingan.

Qayd etilishicha, kompaniyada spirt bilan bir qatorda, quvvati yiliga 5,36 ming tonnagacha bo‘lgan glyuten tayyorlash bo‘yicha yangi liniya ishga tushirilgan. Kompaniya daromadlar o‘sishining yuqori sur’atlarini namoyish etmoqda, rentabellik esa bozor darajasida hisoblanadi.

• Spirt