Qo‘qon shahrining “Zilol” mahallasida chinor daraxtini kesishga urinib, qochib ketganlar ushlandi. Bu haqda Farg‘ona viloyat Ekologiya boshqarmasi xabar berdi.

Ma’lum bo‘lishicha, Farg‘ona viloyat prokuraturasi, Ekologiya boshqarmasi Qo‘qon shahri bo‘limi hamda IIB xodimlari bilan hamkorlikda “Zilol” MFYda o‘rganish ishlari olib borilgan.

Unda noma’lum shaxslar tomonidan hech qanday ruxsatnomasiz ko‘pyillik chinor daraxtining yarim qismiga qadar arralangani aniqlangan. Dalolatnomaga ko‘ra, o‘simlik dunyosiga 117 mln so‘m yetkazilgan zarar hisoblangan.

Olib borilgan surishtiruv ishlari davomida aniqlanishicha, 13-fevral kuni Uchko‘prik tumani, “Farovon” mahallasi, Kaltasoy qishlog‘ida yashovchi ikki nafar fuqaro chinorni qasddan shikastlagan.

Ularning harakatlarida Ma’muriy javobgarlik to‘g‘risidagi kodeksning 183-moddasi (mayda bezorilik) bilan huquqbuzarlik sodir etilgani aniqlangan va har biriga ma’muriy qamoq jazosi tayinlangan.

Shuningdek, holat yuzasidan Jinoyat kodeksining 198-moddasi (yashil zonalarda daraxtlar va butalarni noqonuniy kesish yoki shikastlash) bo‘yicha jinoyat ishi qo‘zg‘atilgan.

• Ekologiya
• Farg‘ona
• Qo'qon
• ma’muriy qamoq