Ma’lum qilinishicha, 2024-yil 12-dekabr kuni Qo‘qon davlat pedagogika instituti talabalar turar joyining 3-qavatidan o‘zini pastga tashlab og‘ir tan jarohati olgan talaba qizga tibbiy yordam ko‘rsatilganiga qaramasdan, uning hayotini saqlab qolishning iloji bo‘lmagan.

Prokuratura surishtiruv natijalariga ko‘ra, mazkur holat shaxsiy muammolar sababli sodir bo‘lgani aniqlangan va shu sabab jinoyat ishi qo‘zg‘atish rad etilgan. Shuningdek, bunday holatlarning oldini olish maqsadida suitsidga qarshi profilaktika ishlarini kuchaytirish tavsiya etilgan.

Marhuma qizning dafn marosimi yaqinlari ishtirokida o‘tkazilgan. Institut rahbariyati oilasiga moddiy-ma’naviy yordam ko‘rsatib, og‘ir kunlarda ular bilan birga bo‘lgani aytilmoqda.

Hozirda talabalar turar joylarida xavfsizlikni ta’minlash uchun maxsus qoidalar joriy etilgan. Shuningdek, kunlik nazorat va psixologik ko‘mak yo‘lga qo‘yilgan.