Xabarda aytilishicha, 20-sentabr kuni Janyatog‘ qishlog‘ida “antiterror tadbirlari”da ishtirok etayotgan Ozarbayjon harbiylari ichida Rossiya tinchlikparvar kuchlari bo‘lgan mashinaga qarata o‘q uzgan. Bosh prokuraturaning da’vo qilishicha, ular “og‘ir relyef hamda tumanli va yomg‘irli ob-havo sharoiti” tufayli avtomobilni “noqonuniy arman qurolli guruhlariga tegishli” deb o‘ylab “yanglishgan”.

Idora, shuningdek, Rossiya tinchlikparvar kuchlariga tegishli yana bir avtomashina o‘qqa tutilgani haqida xabar berdi. Bu voqea ham 20-sentabr kuni Janyatog‘ hududida sodir bo‘lgan. Oqibatda bir rossiyalik harbiy halok bo‘lgan, yana biri yaralangan.

Ozarbayjon Bosh prokuraturasi ularning o‘qqa tutilishi “Armaniston qurolli tuzilmalarining noma’lum a’zolari” tomonidan amalga oshirilganini ma’lum qildi.

Xabarda aytilishicha, har ikki fakt bo‘yicha jinoiy ish qo‘zg‘atilib, Ozarbayjon Bosh prokuraturasi huzuridagi Tergov departamenti tomonidan tergov harakatlari olib borilmoqda.

Rossiya Telegram-kanallari Rossiya tinchlikparvar kuchlarining o‘qqa tutilgan mashinasi aks etgan suratlarni tarqatdi.

Manbaning aytishicha, ushbu qotillikda qo‘l ostidagilari aybdor bo‘lgan Ozarbayjon Qurolli kuchlari korpusi qo‘mondoni o‘z vazifasidan chetlashtirilgan. Ozarbayjon tomoni bu ma’lumotni hali tasdiqlamadi.

21-sentabr kuni Ozarbayjon prezidenti Ilhom Aliyev Vladimir Putin bilan telefon orqali suhbatida “Qorabog‘da Rossiya tinchlikparvar qo‘shinlarining fojiali o‘limi munosabati bilan uzr so‘radi va chuqur hamdardlik bildirdi”.

• Ozarbayjon
• Rossiya
• Tog‘li Qorabog‘