Kecha, 29-dekabr kuni soat 16:45da Qoraqalpog‘iston Respublikasi Favqulodda vaziyatlar boshqarmasiga ikki nafar bolaning ko‘l o‘rtasida qolib ketgani haqida xabar kelib tushgan.

Nukus shahri “Jana bazar” hududidagi “Qosko‘l” drenaj ko‘lida muz yorilishi natijasida qolib ketgan ikki nafar 11 yoshli bola o‘z vaqtida qutqarilgan.

Chaqiruvga ko‘ra, voqea joyiga Favqulodda vaziyatlar boshqarmasining maxsus otryadi yetib kelib, K.Yu. va A.A. larni muzdan olib chiqib, birinchi tibbiy yordam ko‘rsatgan va tez yordam xizmatiga topshirgan.

Tez tibbiy yordam xizmati xabariga ko‘ra, o‘smirlarning ahvoli yaxshi.

Ma’lum bo‘lishicha, bolalar muz ustida o‘ynash uchun drenaj ko‘liga borishgan va muzning yupqa qismi yorilishi natijasida suvga tushib ketishgan. So‘ng ular qalin muzga o‘tib, yordam kutishgan. Ularni ko‘rgan fuqarolar esa “1050” raqamiga qo‘ng‘iroq qilishgan.  

• FVV
• Qoraqalpog‘iston