Oliy sud jinoyat ishlari boʻyicha Ellikqalʼa tuman sudida joriy yil oktyabr oyida koʻrib chiqilgan jinoyat ishi tafsilotlarini maʼlum qildi. 

Keltirilishicha, Qoraqalpogʻiston Respublikasi IIV va Beruniy tumani IIB xodimlari tomonidan oʻtkazilgan tezkor tadbirlar davomida 2021-yil 27-aprel kuni soat 18:00larda N.D oʻzining voyaga yetmagan farzandi yaʼni 2020-yil 27-sentyabr kuni tugʻilgan oʻgʻlini sotib moddiy boylik orttirishni koʻzlab, Beruniy tumani hududi, Toʻrtkoʻl tumanida yashovchi A.S ismli fuqaro bilan uchrashgan. 

Unga oʻzining voyaga yetmagan oʻgʻil farzandini 5 ming AQSh dollari miqdoridagi pul evaziga sotishga kelishib, Ellikqalʼa tumani Sarabiy OFY hududida ushbu kelishilgan pullardan 3 500 AQSh dollari va ATB Mikrokreditbankiga tegishli ichida 15 mln. 700 000 soʻm miqdoridagi pullari bor boʻlgan plastik kartasi jami 52 mln. 553 285 soʻm miqdoridagi pullarni olgan vaqtida ashyoviy dalillar bilan ushlangan.

Mazkur ish yuzasidan olib borilgan sud muhokamasida, sudlanuvchi N.D.ning oilaviy ahvoli va sharoitlari oʻrganilganida u ikki nafar farzandi bilan ijarada yashab kelayotgani, bugungi kunda homilador ekanligi aniqlangan.

Maʼlum qilinishicha, Sud sudlanuvchining koʻrsatmalari va mazkur holatlarni inobatga olib, insonparvarlik prinsipiga amal qilgan holda, unga nisbatan 4 yil ozodlikdan mahrum qilish jazosini tayinlab, 2 yil shartli hukm qoʻllashni lozim topgan.

• IIB
• IIV
• Qoraqalpog‘iston