Bugun Toshent shahar hokimligi shahar yo‘l infratuzilmasini yaxshilash, kommunikasiya tarmoqlarini takomillashtirish va tirbandliklarning oldini olish maqsadida "Qo‘yliq" dehqon bozori o‘rnida ko‘prik va yo‘l qurilishini e’lon qilgandi. Bozorning ehtimoliy ko‘chadigan joyi aniq bo‘ldi.

"Yangi Qo‘yliq" bozorning hozirgi joyidan taxminan 8 km uzoqlikda joylashgan. U Foodcity deb nomlanmoqda, bozor saytida berilgan suratlarga qaraganda, bozor allaqachon ishga tushishga tayyor holatga keltirilgani ma’lum bo‘ladi.

Foodcity'ning umumiy maydoni 60 gektar, uning ichida 2500 ta do‘kon va rastalar o‘rnatilgan. Bu O‘zbekistondagi eng katta oziq-ovqat bozori bo‘lishi kutilmoqda.

Bozorga tashrif buyuruvchi aholi qulayligi uchun bozorga nafaqat shahar ichidan, balki boshqa joylardan ham avtobuslar qatnovi yo‘lga qo‘yilgan. Bundan tashqari, katta avtoturargoh yaratilgan bo‘lib, unda 2500 ta yengil mashina va 40 ta yuk mashinasi uchun o‘rin mavjud.

• Bozor
• Toshkent