Qozogʻistonda hukumat COVID-19ʼning yangi, omikron shtammi aniqlangan mamlakatlardan kelgan yoʻlovchilarni bir hafta mobaynida uy karantiniga qoʻyishini maʼlum qildi.

Qozogʻiston Vazirlar Mahkamasi yigʻilishida Sogʻliqni saqlash vaziri Marat Soranov ushbu karantin tartibi joriy yilning 3-dekabridan amalga kirishini aytib oʻtgan. Shuningdek, Janubiy Afrika, Botsvana, Mozambik, Malavi, Madagaskar, Esvatini, Tanzaniya va Gonkongdan kelgan yoʻlovchilar emlangan boʻlishiga qaramasdan, mamlakatga kirish uchun PCR test natijasini taqdim qilishlari zarur.

Taʼkidlanishicha, ogʻir mutatsiyaga uchragan koronavirusning “Omikron” varianti birinchi marta Janubiy Afrikada noyabr oyida aniqlangan boʻlib, qator davlatlar ushbu mamlakatga rejalashtirgan aviareyslarini kechiktirgan.

Keltirilishicha, Jahon sogʻliqni saqlash tashkiloti yangi shtammning xavfli darajasi kuchli ekanini eʼlon qilgan. Olimlarning dastlabki tadqiqotlari shuni koʻrsatadiki, “Omikron” shtammi bilan infeksiya xavfi yana ortishi mumkin.

Mazkur holat yuzasidan, BMT Bosh kotibi juda xavotirda ekanligini oʻzining Twitter tarmogʻida eʼlon qilgan.

JSSR rahbari Tedros Adhanom Gebreyesus Jenevada boʻlib oʻtgan Jahon sogʻliqni saqlash assambleyasining yigʻilishida soʻzlagan nutqida vaksinalarning tengsizligi yangi yuqori mutatsiyaga uchragan variantlar paydo boʻlishiga yordam berganini aytgan.

• Qozog‘iston
• Xorij
• koronavirus